: बंगलादेशको अन्तरिम सरकारले चटगाउँको मिरसराईमा प्रस्तावित भारतीय आर्थिक क्षेत्र परियोजना रद्द गर्ने घोषणा गरेको छ। अब भारतीय आर्थिक क्षेत्रको सट्टा रक्षा औद्योगिक पार्क निर्माण गर्ने निर्णय गरिएको छ।
बीबीसी बंगलाका अनुसार बंगलादेश आर्थिक क्षेत्र प्राधिकरण (बेजा) का कार्यकारी अध्यक्ष चौधरी आशिक महमुद बिन हारुनले पत्रकार सम्मेलनमार्फत जानकारी दिएका हुन्। समाचार एजेन्सी बीएसएसका अनुसार पत्रकार सम्मेलनमा प्रमुख सल्लाहकारका प्रेस सचिव शफिकुल आलम पनि उपस्थित थिए।
सोमबार ढाकाको तेजगाउँस्थित प्रमुख सल्लाहकारको कार्यालयमा भएको BEZA गभर्निङ बोर्डको बैठकले उक्त निर्णय गरेको हो। बैठकको अध्यक्षता अन्तरिम सरकारका प्रमुख सल्लाहकार प्रोफेसर मोहम्मद युनुसले गरेका थिए।
बेजाका कार्यकारी अध्यक्ष चौधरी आशिक महमूदले मिरसराईमा भारतको प्रस्तावित भारतीय आर्थिक क्षेत्रको लागि ठूलो क्षेत्रफल जग्गा छुट्याइएको बताए। त्यो परियोजना रद्द भएपछि नयाँ रक्षा औद्योगिक पार्कको लागि जग्गा प्रयोग गर्ने निर्णय समेत भएको छ।
हालैका विश्वव्यापी द्वन्द्वहरूलाई उद्धृत गर्दै चौधरी आशिक महमूदले कहिलेकाहीं आधुनिक लडाकु विमानहरूको अभावले मात्रै नभइ गोला बारुद वा ट्याङ्कको एक्सल जस्ता आधारभूत उपकरणहरूको अभावले ठूला संकटहरू निम्त्याउने गरेको बताए। उनले घरेलु रूपमा यस्ता उपकरणहरू उत्पादन गर्ने क्षमता विकास गर्नुपर्ने आवश्यकतामा जोड दिए।
