:अख्तियार दुरूपयोग अनुसन्धान आयोगले राप्ती स्वास्थ्य विज्ञान प्रतिष्ठानका तत्कालीन उपकूलपति प्रा.डा. संगिता सिंह भण्डारीसमेत १९ जनाविरुद्ध भ्रष्टाचार मुद्दा दायर गरेको छ। सीटी स्क्यान मेसिन खरिदमा अनियमितता भएको ठहर गर्दै १९ जना व्यक्ति र एक कम्पनीविरुद्ध बिहीबार विशेष अदालत काठमाडौंमा आरोप पत्र दायर भएको हो।
अख्तियारका अनुसार प्रतिष्ठानका तत्कालीन उपकूलपति भण्डारी,तत्कालीन कामु रजिष्ट्रार कैलाश प्रसाद देव,निर्देशक डा.सागर पन्थी, रेडियोलोजी विभाग प्रमुख डा.बोम विसी, बायोमेडिकल इन्जिनियरहरू,अन्य कर्मचारी तथा हिमालयन मेडिटेक प्रालि र कम्पनीका सञ्चालकहरू अमर श्रेष्ठ र सन्जु राजकर्णिकारसमेतको मिलेमतोमा भ्रष्टाचार भएको अख्तियारको ठहर छ। उनीहरूविरुद्ध प्रतिव्यक्ति ७ करोड ३१ लाख ८२ हजार ९८५ लाख विगो माग गरिएको छ।
सार्वजनिक खरिद ऐन र नियमावली उल्लंघन गर्दै खरिद गुरुयोजना र आवश्यकताको पहिचानबिनै सीटी स्क्यान मेसिन खरिद प्रक्रिया अघि बढाइएको,प्राविधिक स्पेसिफिकेशन र लागत अनुमान त्रुटिपूर्णरूपमा तयार गरिएको तथा राष्ट्रियस्तरको बोलपत्रमा अन्तर्राष्ट्रिय प्रावधान घुसाइएको अख्तियारको दावी छ।
यस प्रक्रियाबाट सिटी स्क्यान मेसिन खरिद,प्रतितपत्र,भन्सार तथा बैंक शुल्कसमेत गरी ७ करोड ३१ लाख ८२ हजार ९८५ रुपैयाँ भुक्तानी गरिएको र यसले प्रतिष्ठानलाई अतिरिक्त आर्थिक भार परेको अख्तियारको दाबी छ।
अख्तियारले सबै प्रतिवादीहरूमाथि भ्रष्टाचार निवारण ऐन,२०५९ अन्तर्गत कैद,बिगो बराबर जरिवाना र बिगो असुल उपरको सजाय मागदाबी गर्दै मुद्दा दायर गरेको जनाएको छ।
