— डेमोक्रेटिक रिपब्लिक अफ कंगोको पूर्वी क्षेत्र रुबाया कोल्टान खानी भत्किँदा २०० भन्दा बढी व्यक्तिको मृत्यु भएको छ।
यो खानी क्षेत्र एएफसी/एम२३ विद्रोहीको कब्जामा छ । यहाँ विद्रोहीले नियुक्त गरेका गर्भनरका प्रवक्ता लुमुम्बा कम्बेरे मुयिसाले घटनामा कामदार, महिला र बालबालिकाको मृत्यु भएको बताए ।
'यो पहिरोमा २०० भन्दा बढी व्यक्ति परेका छन् । उत्खननमा संलग्न कामदार, बालबालिका र बजारका महिलाको मृत्यु भएको छ । केही गम्भीर घाइते छन्,' मुयिसाले भने, 'वर्षायाममा भएकाले जमिन नरम छ। खाल्डोभित्रै मानिसहरू काममा हुँदा जमिन भासियो ।'
संयुक्त राष्ट्रका अनुसार एएफसी/एम२३ समुहले यस क्षेत्रका साधन-स्रोत कब्जा गरेर आफ्नो विद्रोहका लागि कोष जुटाइरहेको छ । यो समूहमाथि छिमेकी रूवान्डाको समर्थन रहेको आरोप पनि लाग्छ । जसलाई रूवान्डाले अस्विकार गर्दै आएको छ ।
यी सशस्त्र विद्राहीहरुले कंगोका टुट्सी अल्पसंख्यकमाथि वर्तमान सरकारले दमन गरेको आरोप लगाउँदै आएका छन् । गत वर्ष उनीहरूले रूबाया कब्जा गरेका थिए ।
विश्वको झन्डै १५ प्रतिशत कोल्टान रूबाया क्षेत्रमा छ । यसलाई प्रशोधन गरेर ताप प्रतिरोधी धातु टान्टालम बनाइन्छ। जसको प्रयोग मोबाइल फोन, कम्प्युटर, एरोस्पेस कम्पोनेन्ट र ग्यास टर्बाइन बनाउन गरिन्छ ।
