— नेपाली कम्युनिस्ट पार्टी (नेकपा)ले संयाेजक पुष्पकमल दाहालकाे नेतृत्वमा निर्वाचन परिचालन रणनीति बनाउने तयारी गरेकाे छ ।
पार्टी एकता अभियानमा जोड दिइरहेकाे नेकपाले दाहालको नेतृत्वमा निर्वाचन परिचालन समिति गठन गरी रणनीति बनाउन लागेको हो ।
दाहालका प्रमुख स्वकीय सचिव गोविन्द आचार्यले १६५ निर्वाचन क्षेत्रमा संगठन परिचालन, प्रदेशमा सभा गर्नेलगायत विषयमा निर्वाचन कार्यक्रम बनाउने तयारी भइरहेकाे बताए । प्रदेशका सभालाई संयोजक दाहालले सम्बोधन गर्नेछन् । ‘प्रभावकारी रुपमा निर्वाचन परिचालन गर्ने कार्यक्रम बन्दैछ,’ उनले भने, ‘१६५ वटै निर्वाचन क्षेत्रमा पूर्णरुपमा संगठन परिचालन गर्ने तयारी छ ।’ यसअन्तर्गत सबै निर्वाचन क्षेत्रमा केन्द्रीय सदस्यलाई परिचालन गरिनेछ । नेकपामा हाल २५ सय केन्द्रीय सदस्य छन् ।
यस्तै, नेकपाका उम्मेदवारहरु घोषणापत्रविनै मतदाताको घरमा पुगिरहेकाले छिटै घोषणापत्र ल्याउने बारे छलफल पनि भइरहेकाे स्वकीय सचिव आचार्यले बताए ।
