: कोरियाको रोजगार तथा श्रम मन्त्रालयले हाललाई रोस्टर अवधि थप गर्न नसकिने स्पष्ट पारेको छ। सउलस्थित नेपाली राजदूतावास र कोरियन रोजगार तथा श्रम मन्त्रालय बीच भएको छलफलमा कोरियन पक्षले सबै देशमा ईपीएस प्रणाली एकरूपतापूर्वक लागू भएकाले नेपालका लागि मात्र नियम परिवर्तन गरेर रोस्टर अवधि थप गर्न नसकिने बताएको हो।
छलफलमा कोरियन पक्षले सेक्टर परिवर्तन गर्न नसकिने भनी जानकारी प्राप्त भएको साथै कोरियाद्वारा सञ्चालित परीक्षा प्रणाली पारदर्शी एवं विश्वसनीय रहेको, कुनै पनि व्यक्ति, कर्मचारी वा निकायले आफूले चाहे अनुरूप जब म्याचिङ फाइल पठाउन नसकिने गरी स्वचालित अनलाइन प्रणाली रहेको हुँदा यस प्रणालीप्रति कुनै शंका नगर्न नगराउन पुनः स्मरण गराएको थियो।
नेपालको श्रम, रोजगार तथा सामाजिक सुरक्षा मन्त्रालयले आज विज्ञप्ति जारी गरेर सउलमा भएको छलफल बारे जानकारी गराएको हो। विगत केही समयदेखि आफ्ना विभिन्न मागहरू राखी विभिन्न क्षेत्रका रोस्टरमा रही दक्षिण कोरिया जान प्रतिक्षामा रहेका तथा रोस्टर अवधि समाप्त भएका व्यक्तिहरुले ईपीएस कार्यालय तथा सीबीटी/युबीटी हल, भैंसेपाटी अगाडि धर्ना, जुलुस, आन्दोलन गरिरहेका छन्।
सामाजिक सुरक्षा मन्त्रालयले पीडितको मागहरूप्रति गम्भीर एवं सम्वेदनशील रहेको बताएको छ। मागकर्ताहरुले राखेका मागका विषयमा वार्ता समिति समेत गठन गरी ईपीएस कोरिया शाखाले नियमितजसो मन्त्रालय, विभाग, ईपीएस सेन्टर नेपाल, मागरत पक्ष, नेपाली राजदूतावास, सिओल र कोरियाको मानव संसाधन विकास केन्द्रसँग अनलाइनमार्फत समस्या समाधानको पहलका लागि निरन्तर पत्राचार, बैठक, संवाद एवं छलफल गरिरहेको जनाएको छ।
मन्त्रालयले दक्षिण कोरिया सरकारसँग कूटनीतिक पहलका लागि पत्राचार गरी वार्ताको विषयवस्तु समेत निर्धारण भइसकेको र कोरियन पक्षबाट आमन्त्रण सहितको जानकारी आए लगत्तै एक उच्च स्तरीय टोली दीर्घकालीन रूपमा समस्या समाधानार्थ छिट्टै दक्षिण कोरिया प्रस्थान गर्ने कार्यक्रम रहेको उल्लेख गरेको छ। मन्त्रालयबाट समस्या सामाधानका लागि गठित छानबिन समितिले बुझाएको प्रतिवेदनमा औंल्याइएका सुझावहरु सम्बन्धित निकायबाट क्रमशः कार्यान्वयनमा गइरहेको विज्ञप्तिमा उल्लेख छ।
