— नेपालले भारतसँग ‘जिटुजी’ प्रक्रियाबाट खरिद गरेको ३० हजार टन युरिया मलमध्ये २२ हजार ५ टन बिभिन्न नाकाबाट भित्रिएको छ ।
कृषि सामग्री कम्पनी लिमिटेड मधेश प्रादेशिक कार्यालय वीरगन्जका प्रमुख दुर्गाप्रसाद पाण्डेका अनुसार वीरगन्ज र विराटनगर नाकाबाट गरी हालसम्म २२ हजार ५ सय टन युरिया मल भित्रिएको हो ।
कम्पनीले भारतको राष्ट्रिय केमिकल्स एण्ड फर्टिलाइजर्स लिमिटेडसँग उक्त मल सोझै खरिद गरेको हो । हालसम्म वीरगन्ज नाकाबाट १३ हजार ५ सय र विराटनगर नाकाबाट ८ हजार ५ सय टनयुरिया भित्रिसकेको छ । वीरगन्ज नाकाबाट मात्रै ७ वटा रेल्वे र्याकमा मल भित्रिएको हो ।
भारतको राष्ट्रिय केमिकल्स एण्ड फर्टिलाइजर्स लिमिटेडले अन्तराष्ट्रिय कम्पनी आदित्य बिरलालाई उक्त मल ढुवानीको ठेक्कादिएकोमा उसले इन्डोनेसियाबाट उक्त मल कोलकाता बन्दरगाह हुँदै नेपालसम्म आपूर्ती गरेको हो ।
हालसम्म वीरगन्ज नाकाबाट १४ हजार टन मल भित्रिएकोमा त्यसमध्ये वीरगन्ज प्रादेशिक कार्यालयले ९ हजार टन र भैरहवा प्रादेशिक कार्यालयले ५ हजार टन मल पाएको छ ।
विराटनगर तर्फ कोलकाता बन्दरगाहबाट सोझै जोगबनी नाकाबाट ८ हजार ५ सय टन मल भित्रिएर कोशी प्रादेशिक कार्यालयले आफ्नो भागको मल पूर्ण रुपले पाइसकेको छ ।
यो कन्साइन्मेन्टको कूल ३० हजार टनमध्ये कम्पनी वीरगन्ज प्रादेशिक कार्यालयले११ हजार ५ सय टन, भैरहवा प्रादेशिक कार्यालयले १० हजार टन र विराटनगर प्रादेशिक कार्यालयले ८ हजार ५ सय टन मल पाउने हो । अब वीरगन्ज कार्यालयले २ हजार ५ सय र भैरहवा कार्यालयले ५ हजार टन मल पाउन बाँकी रहेको छ । भैरहवाको मल पनि वीरगन्जबाटै ढुवानी गरेर लगिँदै छ । हाल भित्रिरहेको युरिया आउँदो चैते धान र वर्षे धान बाली सिजनका लागि उपयोगी हुने पाण्डेले बताए ।
