— प्यालेस्टाइनको गाजापट्टीमा बिहानैदेखि इजरायली सेनाले गरेको आक्रमणमा परेर कम्तिमा २१ जनाको मृत्यु भएको छ । मृत्यु हुनेमा धेरैजसो महिला र बालबालिका रहेको अलजजीराले जनाएको छ ।
१० दिन र ५ महिनाका शिशुसहित ५ बालबालिका, ७ महिला र एक स्वास्थ्यकर्मीको मृत्यु भएकोे विभिन्न अस्पताल स्रोतहरुमार्फत अमेरिकाको नेशनल पब्लिक रेडियो (एनपिआर) ले पुष्टि गरेको छ ।
इजरायलले बिहानैदेखि तुफाह र जेटाउमा आक्रमण गरेको थियो । प्यालेस्टिनी रेड क्रेसेन्ट सोसाइटी (पीआरसीएस) ले घाइतेहरुलाई राफा नाकाबाट चाडैं बाहिर निकालिने बताएको छ ।
‘गाजापट्टीमा हाम्रा मानिसविरुद्ध जातीय युद्ध चलिरहेको छ,’ गाजा शहरको साफिया अस्पतालका निर्देशक डक्टर मोहमद अबु सेल्मियाले सामाजिक सञ्जालमा लेखे, ‘कहाँ गयो युद्धविराम ? कहाँ छन् मध्यस्थकर्ता ?’
एक इजरायली सैन्य अधिकारीले नाम नछाप्ने शर्तमा एपीसँग आक्रमण अझै लामो समय चल्नसक्ने बताएका छन् । हमास र इजरायलबीच गत अक्टुबरमा युद्धविराम सम्झौता भएपनि इजरायलले गाजामा आक्रमण गर्न छाडेको छैन ।
अक्टुबर २०२३ मा युद्ध सुरु भएयता ७१ हजार ८ सय प्यालेस्टिनीले ज्यान गुमाइसकेको गाजास्थित स्वास्थ्य मन्त्रालयले जनाएको छ ।
