: नेकपा एमालेले निर्वाचनका लागि सरकारले अहिलेसम्म भरपर्दो र विश्वासिलो वातावरण बनाउन नसकेको आरोप लगाएको छ।
निर्वाचनका सन्दर्भमा बुधबार पार्टी कार्यालय च्यासलमा पत्रकार सम्मेलन गर्दै एमालेले देशका विभिन्न जेल तथा सुधार गृहबाट भागेका कैदीबन्दी फरार रहेको, हजारौं हातहतियार बाहिरै रहेको र राजधानीमा नै संगठित लुटपाट र चोरीका घटनाहरूमा वृद्धि भइरहेकाले शान्ति सुरक्षामा गम्भीर प्रश्न उठेको जनाएको हो। निर्भिकतापूर्वक मतदानको वातावरण बनाउन पार्टीले सुरुदेखि नै सरकारको ध्यानाकर्षण गराए पनि सरकारले गम्भीरतापूर्वक नलिएको एमालेको भनाइ छ।
एमालेले विभिन्न घटनाको शीघ्र छानबिन गरि दोषीलाई कानुनी दायरामा ल्याउन तथा आगामी दिनमा यस्ता घटना दोहरिन नदिन सुरक्षा व्यवस्थाको प्रत्याभूति गर्न माग गरेको छ। त्यस्तै एमालेले दल तथा उम्मेदवारविरुद्ध प्रविधिको दुरुपयोग गर्दै भ्रम सिर्जना गरिएको भन्दै त्यस्तालाई कारबाहीको दायरामा ल्याउन माग गरेको छ।
पत्रकार सम्मेलनमा एमाले उपाध्यक्ष एवं निर्वाचन परिचालन कमिटीका संयोजक रामबहादुर थापा बादलले सबै दलहरू निर्वाचनको तयारीमा लागेका बेला सुरक्षाको प्रत्याभूत हुन नसकेको बताए। उनले मौसम र हिमपातलाई बहाना बनाउँदै २१ फागुनको चुनाव सार्ने बहाना खोजिरहेको देखिएको बताए। उपाध्यक्ष थापाले देशलाई अघि बढाउन केही निर्वाचन क्षेत्रमा सहकार्य हुन सक्ने भन्दै यसबारे अन्य दलसँग छलफल भइरहेको जानकारी दिए।
उनले वर्तमान सरकार स्वतन्त्र र निष्पक्ष निर्वाचन गराउने भन्दा पनि षड्यन्त्रकारी ढंगले सत्ता लम्ब्याउने बाटोमा अघि बढ्न खोजेको आरोप समेत लगाए। न्यायलयलाई समेत आफ्नो छाँयामा पारेर शक्ति सन्तुलन बिगार्ने प्रयास हुन खोजेको उनको भनाइ छ।
