— रास्वपा केन्द्रीय सभापति रवि लामिछाने भोलि बिहीबार चितवन आउने भएका छन् । उनी चितवन-२ मा उम्मेदवार छन् ।
रास्वपा चितवन जिल्ला सभापति कृष्ण भुषालका अनुसार भोलि मध्याह्न लामिछानेले लंकु लक्ष्मीनारायण मन्दिरमा स्वस्ति शान्ति पूजा गर्ने कार्यक्रम छ । त्यसपछि भरतपुर-११ विशाल चोकको घरमा गृहप्रवेश कार्यक्रम रहेको भुषालले बताए ।
'भोलि बिहीबार सवा ११ बजे जहाजबाट चितवन आउने कार्यक्रम छ । पौने १२ बजे लंकु लक्ष्मीनारायण मन्दिरमा स्वस्ति शान्ति पुजा र दिउँसो एक बजे विशालचोक निवासमा गृह प्रवेश कार्यक्रम छ,' जिल्ला अध्यक्ष भुषालले जानकारी दिए ।
लामिछानेले पर्सा जिल्ला अदालतमा रहेको सहकारी ठगी मुद्दा प्रक्रियाका कारण निर्वाचन अधिकृतको कार्यालय आउन सम्भव नभएपछि माघ ६ मा वारेसमार्फत उम्मेदवारी दिएका थिए । त्यस दिन साँझपख केहीबेर भरतपुर आए पनि त्यसपछि उनी सार्वजनिक कार्यक्रममा देखिएका थिएनन् । बिहीबार चितवन आएपछि लामिछाने अलि दिन यतै रहने जिल्ला अध्यक्ष भुषालले बताए ।
चितवन-२ मा लामिछाने २०७९ को आम चुनाव र २०८० वैशाखको उपनिर्वाचनमा उम्मेदवार भएर दुवै चुनावमा फराकिलो मतान्तरसहित विजयी भएका थिए । यो पटक चितवन-२ मा लामिछानेसहित २३ उम्मेदवार चुनावी मैदानमा छन् ।
