: ललितपुर महानगरपालिकाका प्रमुख चिरिबाबु महर्जनले नेपाल सरकारले बीमाको भुक्तानी नगरे महानगरले तिर्ने बताएका छन्।
पाटन स्वास्थ्य विज्ञान प्रतिष्ठानको १८औँ वार्षिकोत्सव कार्यक्रमलाई सम्बोधन गर्दै मेयर महर्जनले पाटन अस्पतालसँगको सहकार्यमा सञ्चालित स्वास्थ्य कार्यक्रमका लागि नेपाल सरकारले बीमाको भुक्तानी नगरे महानगरले तिर्ने बताएका हुन् ।
उनले बीमा बापतको रकम भुक्तानी नहुँदा अस्पताल सञ्चालनमा समस्या उत्पन्न भएको भन्दै सरकारको ध्यानाकर्षण गराए। साथै उनले भुक्तानी नभएर सेवा बन्द गर्नुपर्ने अवस्था आएमा त्यसको प्रत्यक्ष जिम्मेवारी र आलोचना आफूले खेप्नुपर्ने सुनाएका छन् ।
उनले भने, ‘अहिले सुन्नमा आएको छ, नेपाल सरकारले पैसा तिरेन भनेर । बीमाबारे कुरा गर्दा मन्त्रीज्यूसँग रिंगटा लागे जस्तो भयो। कथम् कदाचित यो स्वास्थ्य केन्द्र नेपाल सरकारले भुक्तानी नगरेको कारणले बन्द गर्नुपर्यो भने सबैभन्दा बढी गाली मैले खानुपर्ने रहेछ । पाटन हस्पिटललाई गर्नुपर्ने भुक्तानी समयमै गरिदिनुस्,’ । ‘कथम् कदाचित नेपाल सरकारले अहिलेको निमित्त ललितपुर महानगरपालिकाले यो भुक्तानी गरिदिनु भनेर नेपाल सरकारले एउटा पत्र दियो भने म चाहीँ भुक्तानी गरिदिन्छु । जे पर्ला पर्ला,’ महर्जनले भने ।
महर्जनले नेपाल सरकारले औपचारिक पत्रमार्फत महानगरलाई भुक्तानीको जिम्मेवारी सुम्पेमा महानगरले नै उक्त दायित्व पूरा गर्ने स्पष्ट पारे। साथै उनले पाटन अस्पतालकै प्राविधिक सल्लाह र सुझावअनुसार नयाँ स्वास्थ्य केन्द्र स्थापना गर्न लागिएको र केन्द्र निकट भविष्यमै सञ्चालनमा आउने जानकारी दिए।
यो केन्द्र सञ्चालनमा आएपछि राष्ट्रिय स्वास्थ्य बीमा प्रतिष्ठानमार्फत नगरवासीले गुणस्तरीय सेवा प्राप्त गर्नुका साथै ललितपुर महानगर र पाटन अस्पतालबीचको यो सहकार्य देशभरकै स्थानीय सरकारका लागि उदाहरणीय अभ्यास हुने उनको भनाइ छ ।
