: सिन्धुपाल्चोकको बाह्रविसे नगरपालिकाका संस्थापक मेयर तथा एमाले सिन्धुपाल्चोकका नेता निमफुन्जो शेर्पा नेपाली कम्युनिष्ट पार्टी (नेकपा)मा समाहित भएका छन्। केही दिनअघि एमाले परित्यागको घोषणा गरेका शेर्पा शुक्रबार काठमाडौंमा आयोजित मतदाता भेटघाट तथा पार्टी समायोजन कार्यक्रममार्फत औपचारिकरूपमा नेकपामा समाहित भएका हुन्।
नेकपा सिन्धुपाल्चोक काठमाडौं सम्पर्क समन्वय, प्रतिनिधिसभा क्षेत्र नं. १ निर्वाचन परिचालन समितिद्वारा आयोजित कार्यक्रममा शेर्पालाई पार्टीका संयोजक पुष्पकमल दाहाल ‘प्रचण्ड’, पूर्व सभामुख अग्निप्रसाद सापकोटालगायतका नेताहरूले स्वागत गरेका हुन्।
कार्यक्रममा नेकपाका नेताहरूले शेर्पाको प्रवेशले सिन्धुपाल्चोकमा नेकपाको संगठन थप सुदृढ हुने विश्वास व्यक्त गरे। शेर्पासँगै सिन्धुपाल्चोकका एमालेका ठूलो संख्याका नेता तथा कार्यकर्ताहरू पनि नेकपामा समाहित भएको नेकपा सिन्धुपाल्चोकका संयोजक गोविन्द पराजुललीले बताए। यसलाई आगामी निर्वाचनलाई लक्षित गर्दै जिल्लामा नेकपाको आधार विस्तार र एकताबद्धता सुदृढ गर्ने महत्वपूर्ण कदमका रूपमा हेरिएको उनले जनाए।
कार्यक्रममा प्रतिनिधिसभा सदस्यका लागि सिन्धुपाल्चोक क्षेत्र नं. १ का प्रत्यक्ष उम्मेदवार माधव सापकोटा ‘सुबोध’, समानुपातिक उम्मेदवार लालकान्छा तामाङ, भगवती नेपाललगायत जिल्लाका नेता कार्यकर्ताको उल्लेखनीय उपस्थिति रहेको थियो। नेता तथा कार्यकर्ताको सहभागिताबीच सम्पन्न कार्यक्रममा वक्ताहरूले पार्टी एकता, जनविश्वास र आगामी निर्वाचनमा विजय सुनिश्चित गर्ने प्रतिबद्धता व्यक्त गरेका थिए।
पार्टी प्रवेश गरेका शेर्पाले ‘सामाहित हुने सबै नेता कार्यकर्तालाई पूर्वपार्टीको जिम्मेवारीबाट नघट्ने गरी व्यवस्थापन गरिने’ समझदारी पत्र ग्रहण गर्दै एमालेलाई सिन्धुपाल्चोकमा एउटा वडा पनि नजित्ने बनाउने उद्घोष गरे। ‘हिजोको एमालेलाई असहायको पार्टी भन्थे, आजको एमालेलाई बच्चा मार्ने पार्टी भन्छन्’, उनले भने, ‘त्यस्तो पार्टीमा रहिरहनुको कुनै तुक देखिन।’ उनले आउँदो संघीय निर्वाचनमा नेकपाका उम्मेद्वार माधव सापकोटालाई जिताएरै छाड्ने उद्घोष गरे।
