: प्रधानमन्त्री सुशीला कार्कीले विश्वकपमा सहभागी नेपाली टोलीलाई शुभकामना दिएकी छन्। आईसीसी टी–२० विश्वकपको समूह चरणअन्तर्गत आज मुम्बईको वानखेडे स्टेडियमा प्रतिस्पर्धा गर्ने भएपछि सामाजिक सञ्जालमार्फत उनले राष्ट्रिय धुन गुन्जिनेछ र त्यो विश्वले सुन्ने बताएकी छन्।
कार्कीले कप्तान रोहित पौडेलको नेतृत्वमा रहेको टोलीले आज वानखेडेको मैदानमा नेपालको आत्मविश्वास, एकता र सामूहिकताको बेजोड प्रस्तुति दिने विश्वास व्यक्त गरिन्। उनले विश्वभर छरिएका नेपाली प्रशंसकको साथ र विगतका सफलताको ऊर्जा बोकेर मैदानमा उत्रिन लागेको बताइन्।
‘आज मुम्बईको वानखेडे स्टेडियममा हाम्रो राष्ट्रिय धुन गुन्जिनेछ र त्यो विश्वले सुन्नेछ। कप्तान रोहित पौडेलको टोलीले देखाउनेछ- नेपालको आत्मविश्वास, एकता र सामूहिकताको बेजोड प्रस्तुति।’ उनले लेखेकी छन्, ‘तेस्रो पटक आईसीसी टी–२० विश्वकप खेलिरहेको नेपालसँग यतिखेर संसारभर फैलिएका प्रशंसकको साथ र विगतमा गरेका चमत्कार/सफलताको आड छ। इंग्ल्याण्डसँगको आजको ऐतिहासिक भेटअघि सिङ्गो राष्ट्रका तर्फबाट शुभकामना! विजयी भवः। अनि धेरै माया पनि ।’
