: धादिङको थाक्रे गाउँपालिका वडानम्बर- ६ दशकिलास्थित पृथ्वीलोकमार्गमा आइतबार बिहान भएको सवारी दुर्घटनामा एकजनाको मृत्यु भएको छ भने दुईजना घाइते भएका छन्।
बिहान करिब ७ :३० बजेतिर दाङबाट काठमाडौँतर्फ आउँदै गरेको प्र-३-०१-००६ ख १५५२ नम्बरको बस र विपरीत दिशाबाट काठमाडौंबाट रसुवातर्फ जाँदै गरेको बा. प्र-०१-००६ ख ५२०६ नम्बरको बस ठोक्किदा दुर्घटना भएको हो। दुर्घटनापछि दुवै बस नजिकै रहेको टिनले छाएको खाजा पसलमा समेत ठोक्किन पुगेका थिए।
उक्त खाजा पसल जिल्ला बाँके वैजनाथ गाउँपालिका–१ घर भई हाल पसल सञ्चालन गर्दै आएका ५४ वर्षीय खगेश्वर शर्माले सञ्चालन गर्दै आएका थिए। बस ठोक्किँदा पसल छेउमा टिपर रोकी चिया–नास्ता गरिरहेका टिप्पर चालक धादिङ धुनिवेशी नगरपालिका–९ स्याउले निवासी ३५ वर्षीय सुजन तामाङ गम्भीर घाइते भएका थिए। उनलाई तत्काल उद्धार गरी काठमाडौँस्थित राष्ट्रिय ट्रमा सेन्टर लगिएकोमा उपचारकै क्रममा बिहान १० बजे चिकित्सकले मृत घोषणा गरेका छन्। उनको टाउकोसहित शरीरका विभिन्न भागमा गम्भीर चोट लागेको थियो।
दुर्घटनामा खाजा पसल सञ्चालक खगेश्वर शर्मा खुट्टामा चोट लागेर घाइते भएका छन्। उनको अवस्था मध्यम रहेको र हाल ललितपुरस्थित बी एन्ड बी अस्पतालमा उपचार भइरहेको प्रहरीले जनाएको छ। साथै,काठमाडौँबाट रसुवातर्फ जाँदै गरेको बसमा सवार गल्छी घर बताउने अन्दाजी ८ वर्षीया सफल्ता पुलामी मगर सामान्य घाइते भएकी छन्। उनको थाक्रे पोलिक्लिनिकमा उपचारपछि डिस्चार्ज गरिएको छ।
दुवै बसमा सवार अन्य यात्रुहरू भने सुरक्षित रहेका छन्। दुर्घटनापछि इलाका प्रहरी कार्यालय खानीखोला धादिङ तथा प्रहरी चौकी महादेववेशीबाट ट्राफिकसहितको प्रहरी टोली खटिएर घाइतेको उद्धार तथा उपचारको व्यवस्था गरिएको थियो।
दुर्घटनामा संलग्न दुवै बसका चालकहरू हाल इलाका प्रहरी कार्यालय खानीखोला धादिङको नियन्त्रणमा रहेका छन्। घटनास्थलमा हाल सवारी आवागमन अवरुद्ध नरहेको र दुर्घटनाको कारण तथा घटनासम्बन्धमा थप अनुसन्धान भइरहेको प्रहरीले जनाएको छ।
