— अमेरिकी राष्ट्रपति डोनाल्ड ट्रम्पले सोमबार अमेरिकालाई क्यानडासँग जोड्ने नयाँ पुलको उद्घाटन रोक्ने धम्की दिएका छन् ।
अमेरिकाको डेट्रोइट र क्यानडाको विन्डसर जोड्ने निर्माणाधीन १.५ माइल लामो गोर्डी होवे अन्तर्राष्ट्रिय पुलको उद्घाटनको अनुमति नदिने दाबी उनले सामाजिक सञ्जाल ट्रुथ सोशलमार्फत गरेका हुन् ।
यस पुल निर्माणको मुख्य काम सकिइसकेको छ र केही समय परीक्षण गरेपछि यसै वर्ष उद्घाटन गर्ने लक्ष्य क्यानडाले राखेको छ ।
४ अर्ब डलरभन्दा बढी खर्च गरिने यस पुलको नाम प्रसिद्ध क्यानेडियन आइस हक्की खेलाडी गोर्डी होवेको नाममा राखिएको हो । पुलको पूर्ण भुक्तानी, निर्माण, सञ्चालन र मर्मतसम्भार क्यानडाले गरिरहेको छ । तर, २०१२ को सम्झौतामा यस पुलको संयुक्त स्वामित्व क्यानडा सरकार र अमेरिकाको मिशिगन राज्यको रहने उल्लेख छ ।
पुल निर्माणमा प्रयोग हुने कुनै पनि फलाम र स्टील अमेरिका वा क्यानडामा उत्पादन गरिनुपर्ने पनि सम्झौतामा उल्लेख छ । विन्डसरका मेयर ड्र्यू डिल्केन्सले पुलको मिशिगन तर्फको भागमा निर्माणका क्रममा अमेरिकी स्टील प्रयोग गरिएको बताए । उनले ट्रम्पको चेतावनीलाई 'पागलपन' संज्ञा दिए ।
तीन साताअघि स्विचरल्यान्डको डाभोसमा विश्व आर्थिक मञ्चको कार्यक्रममा बोल्दै क्यानडाका प्रधानमन्त्री म्याक कार्नीले विश्वमहाशक्तिको दबाबविरुद्ध मध्यम तथा साना देशहरु एकजुट हुनुपर्ने बताएका थिए । अमेरिकासँग पहिल्यै बिग्रिएको क्यानडाको सम्बन्धलाई यसले थप असर गरेको छ ।
चीनसँग व्यापार सम्झौता गर्ने सहमति क्यानडाले गरेपछि यो सम्बन्ध थप चिसिएको छ । ट्रम्पले चीनसँग सम्झौता नगर्न क्यानडालाई चेतावनी दिइरहेका छन् । सोमबार पनि उनले ट्रुथ सोशल पोस्टमा सम्झौता नगर्न चेतावनी दिए ।
क्यानडाले चीनसँग व्यापार सम्झौता गरेमा सबै क्यानेडियाली सामानहरूमा १००% भन्सार लगाउने उनको धम्की छ ।
