— राष्ट्रिय स्वतन्त्र पार्टी (रास्वपा) सभापति रवि लामिछानेले मंगलबार पश्चिम नवलपरासीको ११ वटा स्थानमा चुनावी कार्यक्रममा सहभागी भएका छन् ।
जिल्लाको मुख्य बजार क्षेत्र सुनवल, परासी, बेलासपुर, महेशपुर, भुजहवा, सूर्यपुरा, बेलाटारी, रुपौलिया, गोपिगञ्ज, जिमिरेभार र बर्दघाटमा मतदाता भेटघाट र चुनावी कार्यक्रममा उनी सहभागी भएका हुन् ।
जिल्ला प्रशासन कार्यालयले सोमबार आचारसंहिता विपरितका कार्यक्रम नगर्न सूचना प्रकाशित गरे पनि लामिछानेको सहभागितामा जिल्लाको दुई वटै क्षेत्रमा चुनाव लक्षित कार्यक्रम आयोजना गरिएको थियो । चुनाव लक्षित कार्यक्रममा बोल्दै लामिछानेले परिवर्तनका लागि एकजुट हुन र फागुन २१ लाई परिवर्तनको दिनको रुपमा प्रयोग गर्न आग्रह गरे ।
प्रशासनले सोमबार नै यस्ता कार्यक्रम नगर्न सचेत गराएकाले लामिछानेले लामो राजनीतिक भाषण नगरीकन घुमाउरो पारामा आफ्ना उम्मेदवारका लागि भोट मागेका थिए ।
सोमबार जिल्ला प्रशासन पश्चिम नवलपरासीले निर्वाचन आचारसंहिता उल्लंघन नगर्न रास्वपा पश्चिम नवलपरासीलाई आग्रह गरेको थियो । यस्ता कार्यक्रम निर्वाचन आचारसंहिता विपरीत हुने आचारसंहिता विपरीतका गतिविधि नगर्न प्रशासनले सूचना जारी गरेको हो ।
सहायक प्रमुख जिल्ला अधिकारी तथा निर्वाचन आचारसंहिता अनुगमन अधिकृत पोषणराज भण्डारीले आचारसंहिता विपरीत कार्यक्रम आयोजना हुन लागेको सूचना आएकाले यस्ता कार्यत्रम नगर्न ध्यानाकर्षण गराएको बताए ।
निर्वाचन आयोगले फागुन ४ गतेयता घरदैलो र चुनावी कार्यक्रम नगर्न निर्देशन जारी गरे पनि उम्मेदवारहरूले पालना गरेका छैनन् ।
