: तत्कालीन प्रधानमन्त्री शेख हसिनाको सरकार ढलेपछि गठन भएको अन्तरिम सरकारले बंगलादेशमा आज झण्डै १८ महिनापछि निर्वाचन गराएको छ । बंगलादेशी सञ्चारमाध्यमका अनुसार देशभर मतदान सुरु भइसकेको छ र यो स्थानीय समयअनुसार अपराह्न ४:३० बजेसम्म जारी रहनेछ।
जारी मतदानमा नयाँ सरकार चयन गर्न बंगलादेशका १२ करोडभन्दा बढी जनताले मतदान गर्दैछन् । याे सन् २०२४ अगस्टको आन्दोलन पछिको पहिलो चुनाव हो, जुन युवा नेतृत्वको आन्दोलन थियो जसले पूर्व प्रधानमन्त्री हसिनालाई सत्ताबाट हटाएको थियो। हसिनाले देश छोडेदेखि नै नोबेल शान्ति पुरस्कार विजेता मुहम्मद युनुसको नेतृत्वमा रहेको अन्तरिम सरकारले बंगलादेशलाई चलाउँदै आएको छ।
विरोध प्रदर्शनका क्रममा कम्तिमा १,४०० प्रदर्शनकारीहरू मारिए। शेख हसिनामाथि प्रदर्शनकारीहरू विरुद्ध कारबाहीको प्रत्यक्ष आदेश दिएको आरोप लगाइएको छ, जुन आरोपलाई उनले अस्वीकार गरेकी छिन्। गत वर्ष नोभेम्बरमा बंगलादेशको एक अदालतले मानवता विरुद्धको अपराधको आरोपमा हसिनालाई मृत्युदण्डको सजाय सुनाएको थियो।
उनको पार्टी अवामी लिगलाई यस चुनावमा भाग लिन प्रतिबन्ध लगाइएको छ। यो चुनाव अब बंगलादेश राष्ट्रवादी पार्टी र विद्यार्थी आन्दोलनबाट उदय भएको पार्टीसँग गठबन्धन बनाएको इस्लामवादी जमात-ए-इस्लामी बीचको प्रतिस्पर्धा हो। जनताले नयाँ सरकारको पक्षमा मतदान गरिरहेका छन् र संविधान संशोधनका लागि जनमत संग्रहमा पनि भाग लिइरहेका छन्।
