— बंगलादेशमा २०२४ को विद्यार्थी आन्दोलनले शेख हसिनाको १५ वर्षे शासन समाप्त गरेपछि आज पहिलो पटक मतदान भइरहेको छ । यहाँ ३ सय प्रत्यक्ष सिटमा संसदीय चुनाव र जनमतसंग्रह एकसाथ भइरहेको छ ।
बंगलादेशको निर्वाचन आयोगका अनुसार १२ करोड ७० लाख जनाले मतदाता सूचीमा नाम लेखाएका छन् । उनीहरूले देशभरका ४२ हजार ७ सय ७९ वटा मतदान केन्द्रबाट मत खसालिरहेका छन् ।
धेरैजसो स्थानमा शान्तिपूर्ण मतदान चलिरहेको पर्यवेक्षकहरुले जनाएका छन् । अन्तरिम सरकारका प्रमुख सल्लाहकार प्रोफेसर मोहम्मद युनुसले १०ः २६ मिनेट जाँदा गुल्सन मोडल हाई स्कुलमा मत खसालेका छन् । मत खसालेपछि उनले निर्वाचनलाई नयाँ बंगलादेशको जन्मदिन भनेर व्याख्या गरे ।
उनको सरकारले २५ वटा राजनीतिक दलहरूसँगको छलफलपछि ल्याएको 'जुलाई वडापत्र २०२५' पारित गर्ने वा नगर्ने भन्ने विषयमा मतदाताहरूले आजै फैसला गर्नेछन् । यस वडापत्रमा प्रधानमन्त्रीको कार्यकाल सीमा, महिला प्रतिनिधित्व वृद्धिलगायत ८० वटा सुधार प्रस्ताव छ ।
जनमतसंग्रहले यस वडापत्रलाई अनुमोदन गरेमा आगामी संसद्ले अनिवार्य रूपमा यसमा उल्लेखित सुधारहरूलाई समेट्नेगरी संविधान संशोधन गर्नुपर्नेछ । वडापत्र अनुमोदन हुन नसकेमा संसद्लाई यी प्रस्ताव पारित गर्नुपर्ने बा्ध्यता हुनेछैन ।
ढाका–१७ र बगोरा–६ बाट उम्मेदवार रहेका बंगलादेश नेशनल पार्टीका अध्यक्ष तरिक रहमानले गुल्सन मोडल स्कुलबाटै मत खसालेका छन् । जमात् ई ईस्लामीका प्रमुख साफिकर रहमानले ८ः ३० बजे मनिपुर हाई स्कुलबाट मतदान गरे ।
केही स्थानमा झडप तथा केही स्थानमा बिस्फोटका घटना रिपोर्ट भएका छन् । गोपालगञ्जको निचुपारा क्षेत्रस्थित रेश्मा इन्टरनेसनल स्कूल मतदान केन्द्रमा बिहान ९ बजे भएको विस्फोटमा दुई अन्सार सदस्य र एक बालक घाइते भएकोसुपरिन्टेन्डेन्ट अफ पुलिस एमडी सर्वर हुसैनले द द डेली स्टारलाई बताएका छन् ।
त्यसैगरी, मुन्शिगञ्ज सदर उपजिलाको माखाती गुरुचरण हाई स्कूलमा बिहान १० बजे क्रुड बम विस्फोट भएको सदर प्रहरी स्टेसनका ओसी एमडी मोमिनुल इस्लामले पुष्टि गरेका छन् ।
यो निर्वाचनमा अवामी लिग प्रतिबन्धित छ । बांग्लादेश नेशनलिस्ट पार्टी (बीएनपी) र जमात–ए–इस्लामीको गठबन्धन मुख्य प्रतिस्पर्धी मानिएका छन् । विद्यार्थी आन्दोलनबाट जन्मिएको नेशनल सिटिजन पार्टी जमात् नेतृत्वको गठबन्धनमा छ । कुल ६० दल तथा स्वतन्त्र उम्मेदवारहरुले यस निर्वाचनमा प्रतिस्पर्धा गरिरहेका छन् ।
