— निर्वाचन आयोगले आजदेखि हिमाली र विकट जिल्लाहरुमा मतपत्रसहित निर्वाचन सामाग्री पठाउन थालेको छ।
निर्वाचन आयोगका सहायक प्रवक्ता कुलबहादुर जिसीका अनुसार बिहान ११ वजेदेखि हिमाली र विकट जिल्लाहरुमा ढुवानी हुने छ । खाद्य व्यवस्था तथा व्यापार कम्पनी लिमिटेड मार्फत जिल्लाहरुमा ढुवानी हुने जिसीले बताए।
फागुन २१ गतेका लागि तोकिएको प्रतिनिधि सभाको निर्वाचनका लागि पहिलो चरणमा २० हिमाली जिल्लामध्ये १५ वटामा पठाउने अनि नजिकका जिल्लाहरुको ढुवानी गर्ने आयोगको तयारी छ।
दैनिक १५ लाख मतपत्र छपाइ
यसैबीच जनक शिक्षा सामग्री केन्द्र लिमिटेड सानोठिमीले प्रतिनिधिसभाको निर्वाचनका लागि दैनिक १५ लाख मतपत्र छापिरहेको छ ।
प्रतक्ष्यतर्फ कूल दुई करोड तीन लाख थान मतपत्र छपाइ गर्नुपर्नेमा बुधबारसम्म एक करोड ५३ लाख मतपत्र छपाइ सम्पन्न भएको छ ।
दैनिक १३ लाख मतपत्र छपाइ भइरहेकामा अहिले वृद्धि गरि दैनिक १५ लाख मतपत्र छपाइ भइरहेको र शुक्रबारसम्ममा सबै मतपत्र छपाइ सम्पन्न गर्ने लक्ष्यका साथ काम भइरहेको निर्वाचन आयोगले जनाएको छ ।
‘प्रत्यक्षतर्फको मतपत्र छपाइ कार्य तीव्रगतिमा भइरहेको छ, ५० लाख मतपत्र छपाइ बाँकी छ, शुक्रबार साँझसम्म सबै मतपत्र छपाइ सम्पन्न गर्ने लक्ष्यका साथ काम भइरहेको छ। ढिलोमा शनिबारसम्म मतपत्र छपाइ सकिने जानकारी छ,’ जिसीले भने ।
उम्मेदवार धेरै भएको जिल्लामा ठूलो आकार र थोरै उम्मेदवार भएको जिल्लामा सानो मतपत्र छाप्नुपर्ने हुँदा केही समय छपाइ सम्पन्न हुन ढिलाइ भएको केन्द्रको भनाइ छ ।
केन्द्रले बागमती र मधेश प्रदेश बाहेक अन्यलाई पहिलो प्राथमिकता राखेर मतपत्र छपाइ गरेको थियो । छपाइ सम्पन्न गरेका १० लाख नमुना मतपत्र आयोगले विभिन्न ठाउँमा पुर्याइसकेको छ।
दुई करोड आठ लाख ३० हजार समानुपातिकतर्फको मतपत्र छपाइ गरी प्याकिङ सम्पन्न गरी केन्द्रले प्रतक्ष्यतर्फको मतपत्र छपाइ सुरु गरेको थियो ।
