— युक्रेनका राष्ट्रपति भोलोदिमिर जेलेन्स्कीले दुई शर्तमा मात्रै निर्वाचन गरिने बताएका छन् । त्यसका लागि सुरक्षाको ग्यारेन्टी हुनुपर्ने र रुससँग युद्धविराम हुनुपर्ने शर्त उनले राखेका हुन् ।
चुनावका विषयमा सोधिएको प्रश्नमा बुधबार पत्रकारसँगको व्हाट्सएप च्याटमा जेलेन्स्कीले भने, ‘सबै सम्बन्धित सुरक्षा ग्यारेन्टी सुनिश्चित भएपछि हामी चुनावतर्फ अघि बढ्नेछौं ।
युक्रेनले कहिल्यै चुनावको विषय उठाएको छैन, यो विभिन्न साझेदारहरूले उठाउने गर्छन् । हामी चुनावका लागि तयार छौं । यो निकै सजिलो छ– युद्धविराम गर, चुनाव हुन्छ । पहिले सुरक्षा, अनि राजनीति गरौं ।’
युक्रेनको संविधानअनुसर संकटकाल लागु भएका बेला राष्ट्रिय चुनाव हुँदैन । रुसले २४ फेब्रुअरी २०२२ मा पूर्ण आक्रमण सुरु गर्न गरेपछि युक्रेनमा संकटकाल लगाइएको थियो ।
रुस तयार भएमा यसै वसन्तभित्र दुई देशबीचको शत्रुता समाप्त हुने पनि उनले बताए । यसअघि फाइनान्सियल टाइम्सले वाशिङ्टनको दबाबपछि युक्रेनले तीन महिनाभित्र राष्ट्रपति चुनाव गर्नेबारे विचार गरिरहेको रिपोर्ट गरेको थियो ।
२०१९ मा निर्वाचित जेलेन्स्कीको कार्यकाल २०२४ मा सकिएको थियो । तर संकटकालीन परिस्थितीले उनको कार्यकाल लम्ब्याइदिएको छ । रुसले उनको वैधानिकतालाई पटक–पटक प्रश्न गर्दै आएको छ ।
अमेरिकी राष्ट्रपति डोनाल्ड ट्रम्पले पनि गत डिसेम्बरमा जेलेन्स्कीको आलोचना गरेका थिए । उनले जेलेन्स्कीसँग कुनै वैधता बाँकी नरहेको आरोप लगाएका थिए ।
अहिले युक्रेनका धेरै भूभाग रुसको कब्जामा छ । त्यहीकारण पनि ती क्षेत्रमा निर्वाचन हुन सक्दैन । त्यस्तै, युक्रेनको नियन्त्रण रहेका क्षेत्रमा पनि रुसले मिसाइल र ड्रोन आक्रमण गरिरहेको छ ।
ठूलो जनसंख्या सेनामा भर्ती भएकाले उनीहरु पनि मताधीकारबाट बन्चित हुनसक्छन् । यी सबै परिस्थिती नमिलेसम्म राष्ट्रिय चुनाव गर्न नसकिने युक्रेनी अधिकारीहरुले बताउँदै आएका छन् ।
