— बंगलादेश नेसनलिस्ट पार्टी (बीएनपी) ले सन् २०२४ को विद्रोहपछि भएको पहिलो निर्वाचनमा शुक्रबार भारी जित हासिल गरेको छ र नेता तारिक रहमान प्रधानमन्त्री बन्ने करिब निश्चित भएको छ ।
निर्वाचन आयोगको तथ्यांकअनुसार बीएनपी गठबन्धनले संसद्को कुल ३०० सिटमा २१२ सिट जितेको छ भने इस्लामवादी नेतृत्वको जमात-ए-इस्लामी गठबन्धनले ७७ सिट जितेको छ । बंगलादेशको संसद्को कुल ३५० सिटमध्ये ५० सिट महिला प्रपितनिधित्वका लागि आरक्षित छ ।
मतदानको दुई दिनअघि रहमानले अपदस्थ प्रधानमन्त्री शेख हसिनाको १५ वर्षे निरंकुश शासनकालमा पराजित भएको आफ्नो पार्टीले १७ करोड जनसंख्या भएको दक्षिण एसियाली राष्ट्रमा पुनः सत्ता प्राप्त गर्नेमा आफू विश्वस्त रहेको बताउको थियो ।
सन् २०२४ मा शेख हसिनालाई अपदस्थ गर्ने सामूहिक प्रदर्शनपछि १७ वर्षभन्दा बढी समय लन्डनको स्वनिर्वासनपछि रहमान गत डिसेम्बरमा बंगलादेश फर्किएका थिए ।
बीएनपीका प्रधानमन्त्रीका उम्मेदवार तारिक रहमान शुक्रबार पार्टीले ‘निर्णायक विजय’ पाएको निर्वाचन आयोगको तथ्यांकले देखाएपछि देशको नयाँ नेता बन्ने निश्चित भएको छ ।
बिहीबारको मतदानमा जाँदै रहमानले एक्लै शासन गर्न पर्याप्त बलियो जनादेश पाउने विश्वास व्यक्त गरेका थिए ।
रहमानले ऐतिहासिक मतदानअघि मतदातालाई मतदानमा सहभागी हुन प्रोत्साहन गर्दै भनेका थिए, 'मलाई विश्वास छ, बङ्गलादेशका जनता भोट हाल्न बाहिर आए भने षड्यन्त्र सफल हुँदैन । नयाँ लोकतन्त्रको सुरुवातका लागि सबैलाई मेरो शुभकामना छ ।' रहमान पूर्वप्रधानमन्त्री स्व. खालिदा जिया र पूर्व राष्ट्रपति स्वर्गीय जियाउर रहमानका जेठा छोरा हुन् ।
जियाउर रहमानको सन् १९८१ मा सैनिक विद्रोहका क्रममा हत्या गरिएको थियो । खालिदा जिया पतिको मृत्युपछि राजनीतिमा प्रवेश गरेकी थिइन् ।
