— जर्मन चान्सलर फ्रेडरिक मर्जले अहिले विधिमा आधारित विश्व व्यवस्थाबाट संसार नचलेको बताएका छन् । म्युनिख सुरक्षा सम्मेलनको उद्घाटन गर्दै उनले विद्यमान व्यवस्थामा कसैको सुरक्षाको ग्यारेन्टी नरहेको बताए ।
युरोप र अमेरिकाबीच गहिरो खाडल सिर्जना भएको उनको भनाइ छ । म्युनिख सम्मेलनमा लगभग ५० विश्व नेताहरू उपस्थित हुँदै छन् । यहाँ युरोपेली सुरक्षा र अन्तर-एटलान्टिक सम्बन्धको भविष्यको बारेमा छलफल गरिनेछ ।
नेटोको सैन्य गठबन्धनप्रति अमेरिकी प्रतिबद्धतामा प्रश्न उठिरहेका बेला यो सम्मलेन आयोजना भएको हो । अमेरिकी राष्ट्रपति डोनाल्ड ट्रम्पले ग्रिनल्यान्डलाई गाभ्ने तयारी गरेपछि त्यसको विरोधमा युरोपेली शक्तिहरुले डेनमार्कलाई साथ दिएका थिए । ग्रिनल्यान्ड डेनमार्कको स्वशासित भूभाग हो ।
ट्रम्पले शुक्रबार पनि ग्रिनल्यान्ड लिएरै छाड्ने बताएका थिए । सैन्य बल प्रयोग गर्ने आफ्नो विगतको अभिव्यक्ती सच्याउँदै उनले अहिले वार्तामार्फत यो क्षेत्र लिने बताइरहेका छन् । ‘ग्रिनल्यान्ड हामीलाई चाहिन्छ । हामी युरोपसँग धेरै राम्रोसँग मिल्छौं । त्यसैले हामी अहिले ग्रीनल्याण्डको लागि वार्ता गरिरहेका छौं ,’ उनले ह्वाइटहाउसबाहिर पत्रकारहरुसँग भने ।
रुस–युक्रेन युद्ध, पश्चिमा राष्ट्र र चीनबीचको तनाव,सम्भावित इरान–अमेरिका आणविक सम्झौतालगायत विषयबारे पनि म्युनिख सम्मेलनमा छलफल हुनेछ ।
मर्जले फ्रान्सेली राष्ट्रपति इमानुएल म्याक्रोंसँग संयुक्त युरोपेली आणविक कार्यक्रमलाई अघि बढाउने विषयमा ‘गोप्य वार्ता’ भइरहेको पनि खुलासा गरे । तर, विस्तृत विवरण खुलाएनन् ।
युरोपमा फ्रान्स र बेलायत मात्र दुई आणविक शक्ति राष्ट्र हुन् जर्मनी र अन्य धेरै युरोपेली राष्ट्रहरु अमेरिकी आणविक छातामुनी छन् । ती राष्ट्रहरुमा अमेरिकाका आणविक हतियार स्टेसन छन् ।
शुक्रबारपछि सम्मेलनलाई सम्बोधन गर्दै म्याक्रोंले नयाँ विश्वव्यापी सन्दर्भमा युरोपले फेरि भूराजनीतिक शक्ति बन्नुपर्ने बताए । सन् २०२२ मा रुसले आक्रमण गरेदेखि नै युरोपले सुरक्षा क्षेत्रमा गहिरो सहकार्य गरिरहेको उनले बताए । उनले अझै ठूलो सामुहिकताको आवश्यकता रहेको बताए ।
‘युक्रेनको युद्धलाई युरोपको अस्तित्वगत चुनौती हो । कोही पनि युरोपेली देश रुसी मागमा नझुक्न आग्रह गर्दछु । बरु, न्यायपूर्ण शान्ति प्राप्त गर्न मस्कोमाथि दबाब बढाउन आवश्यक छ,’ उनले भने ।
