: राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनले नेपाल भू–राजनीतिक चक्रब्युहमा फसिसकेको दाबी गरेका छन् । काठमाडौं–२ मा आयोजित पार्टीको कार्यक्रममा बोल्दै अध्यक्ष लिङदेनले देश ठीक दिशामा नगइराखेको छैन मात्र नभई आज नेपालको निर्णय अधिकार नेपाली जनताको हातबाट बाहिर गइसकेको बताए ।
उनले भने, ‘नेपाल भू–राजनीतिक चक्रब्युहमा फस्यो । अब यसबाट उम्किन गाह्रो छ मात्रै होइन, तरिका मिलेन भने हाम्रो राष्ट्रियता समाप्त हुन सक्छ, खतरातर्फ उन्मुख भइराखेको छ । त्यसैले हामीले मत फेर्नु पर्यो । अहिले नयाँ भन्ने हावा चलेको छ । नयाँ केलाई भन्ने ? अनुहारलाई ? उमेरलाई ? कि विचारलाई ?’
उनले देशको अभिशापको रूपमा गणतन्त्र, धर्मनिरपेक्षता, संघीयता रहेको टिप्पणी गरेका छन् । उनले भने, ‘गणतन्त्र ठीक छ, यही धर्मनिरपेक्षता ठीक छ, यही संघीयता ठीक छ, यसमा मान्छे फेरे हुन्छ भनेर भन्ने हो त कांग्रेस, एमाले, माओवादी जस्तै हो । त्यो त तातो तावाबाट उम्केर भुङ्ग्रोमा परेको माछा जस्तो हुन्छ । त्यसकारण विचारले नयाँ, विचारले विकल्प कसले ल्याएको छ ? कुन पार्टीले बोकेको छ ? कुन उम्मेदवारले बोकेको छ ? त्यो कुरालाई हेरेर मतदान गर्नुप¥यो ।’
अध्यक्ष लिङदेनले जनताले फेसबुक, टिकटक, रिल हेरेर आफ्नो धारणा बनाए त्यो भन्दा दुर्भाग्य अर्को हुनै नसक्ने बताएका छन् । उनले आज नेपालको प्रधानमन्त्री को हुनुपर्छ भनेर विदेशीहरूले योजना बनाइरहेको आरोप समेत लगाएका छन् ।
उनले थपे, ‘आज कति मान्छेहरूले भन्छ, कुन पार्टी विदेशीले बनाई दियो हो राजेन्द्रजी को मान्छे चाहिँ विदेशीबाट परिचालित हो भनेर भन्छ । आज कसलाई थाहा छैन ? आज विदेशीहरूको चलखेल नेपालमा कुन ढङ्गले बढेको छ ? आज नेपालको प्रधानमन्त्री को हुनुपर्छ भन्ने कुरा अरूले योजना बनाइदिन थालिसक्यो । को–को मिल्नु पर्छ, को–को छुट्टिनु पर्छ भन्नेसम्म बन्दोबस्ती अरूले गर्दिन थाल्यो । यसले हामीलाई कहाँ लान्छ ?’
