— युरोपेली युनियन पर्यवेक्षण मिशन ((ईयू ईओएम) ले बिहीबार बंगलादेशमा सम्पन्न निर्वाचन निष्पक्ष र विश्वसनीय रहेको जनाएको छ ।
मिशनका प्रमुख पर्यवेक्षक तथा युरोपेली संसद्का सदस्य इभर्स इजाब्सले आज ढाकामा आयोजित प्रेस ब्रिफिङमा प्रारम्भिक प्रतिवेदन प्रस्तुत गरे । उनले यो निर्वाचन लोकतान्त्रिक र कानुनी शासन पुनर्स्थापनातर्फको 'महत्त्वपूर्ण कदम' रहेको बताए ।
'२०२६ को संसदीय निर्वाचन साँच्चै प्रतिस्पर्धात्मक थियो । यसमा मौलिक स्वतन्त्रताहरूको सम्मान गरियो,' इजाब्सले भने, 'निर्वाचन सम्बन्धी कानुनी ढाँचा अन्तर्राष्ट्रिय मापदण्डअनुरूप छ । बंगलादेश निर्वाचन आयोगले स्वतन्त्र र पारदर्शी रूपमा काम गरेको छ । यसले सरोकारवालाहरूको विश्वास कायम राख्यो र विश्वासिलो निर्वाचन गरायो ।'
ईयू पर्यवेक्षककाअनुसार, निर्वाचन शान्त र व्यवस्थित थियो । मतदान केन्द्रमा खटिएकाहरुले कुशलतापूर्वक मतदान र मतगणना गरे ।
मिशनले केही कमजोरीहरू पनि औंल्याएको छ । जसमा अपाङ्गता भएकाहरूको सीमित सहभागिता, महिलाहरूको लागि राजनीतिक स्थानमा प्रतिबन्ध, छिटपुट स्थानीय राजनीतिक हिंसा, मित्था सुचनाको प्रचारलगायत छन् ।
आदिवासी समुदाय र अल्पसंख्यकहरूको प्रतिनित्व राजनीतिमा कम भएको पनि पर्यवेक्षकहरुले बताए । इजाब्सले बंगलादेशलाई स्वतन्त्र संस्थाहरू, मानवअधिकार र उत्तरदायित्व प्रवर्द्धन गर्न पनि आग्रह गरे ।
