: अमेरिकी राष्ट्रपति डोनाल्ड ट्रम्पले विश्वकै सबैभन्दा ठूलो युद्धपोत मध्यपूर्व क्षेत्रमा तैनाथ गर्न आदेश दिएका छन् । राष्ट्रपति ट्रम्पले इरानको आणविक र ब्यालिस्टिक क्षेप्यास्त्र कार्यक्रममाथि दबाब बढाउँदै दोस्रो विमानवाहक युद्धपोत मध्यपूर्व पठाउन लागेको समाचार संस्था अल जजिराले लेखेको छ ।
शुक्रबार ह्वाइट हाउसमा बोल्दै ट्रम्पले यूएसएस जेराल्ड आर फोर्ड क्यारिबियनबाट ‘चाँडै’ मध्यपूर्वतर्फ प्रस्थान गर्ने पुष्टि गरेका छन् । ओमानमा गत साता भएका अप्रत्यक्ष वार्तापछि क्षेत्रीय तनाव उच्च रहँदै आएको छ । ‘हामीलाई आवश्यक परे, हामीसँग अत्यन्त ठूलो सैन्य शक्ति तयार हुनेछ’, ट्रम्पले भने । उनले वार्ता ‘सफल’ हुने विश्वास व्यक्त गर्दै इरानले सम्झौता गर्न असफल भए ‘इरानका लागि त्यो नराम्रो दिन हुने’ चेतावनी दिए ।
पछि ट्रम्पले इरानमा शासन परिवर्तन हुनु ‘हुन सक्ने सबैभन्दा राम्रो कुरा’ हुने बताए । ‘४७ वर्षदेखि उनीहरू कुरा गर्दै आएका छन् । यसबीचमा हामीले धेरै ज्यान गुमाएका छौं’, उनले भने । यो अभिव्यक्ति तेहरानले हालैका सरकारविरोधी प्रदर्शनहरू दमन गर्दा हजारौंको ज्यान गएको घटनातर्फ संकेत गरेको मानिन्छ ।
जेराल्ड आर फोर्डको आसन्न प्रस्थान क्षेत्रीय सैन्य जमघटको निरन्तरता हो । यसअघि अब्राहम लिंकन विमानवाहक युद्धपोत, थुप्रै निर्देशित क्षेप्यास्त्र विनाशक जहाजहरू, लडाकु विमानहरू र निगरानी विमानहरू पनि पठाइसकिएको छ । ट्रम्पका यी अभिव्यक्तिहरू केही दिनअघि उनले वासिङ्टनमा इजरायली प्रधानमन्त्री बेन्जामिन नेतान्याहुसँग भेट गरेपछि आएका हुन् । नेतान्याहुले ‘राम्रो सम्झौता’ अपेक्षित रहेको बताए पनि कुनै पनि सम्झौताले इरानको ब्यालिस्टिक क्षेप्यास्त्र कार्यक्रमलाई पनि सीमित नगरे असन्तुष्टि रहने बताएका थिए । तेहरानले भने क्षेप्यास्त्रबारे छलफल गर्न अमेरिकी दबाबलाई सार्वजनिक रूपमा अस्वीकार गरेको छ ।
जुन महिनामा इजरायल र इरानबीच १२ दिने युद्ध भएपछि नेतान्याहुले थप सैन्य कारबाहीको माग गर्दै आएका छन् । उक्त युद्धमा अमेरिकाले पनि तीन इरानी आणविक स्थलमाथि आक्रमण गर्दै छोटो समयका लागि सहभागिता जनाएको थियो । उक्त सैन्य अभियानलाई ‘मिडनाइट ह्यामर’ नाम दिइएको थियो ।
अमेरिका–इरानबीचका यी अप्रत्यक्ष वार्ताहरू जुनको द्वन्द्वपछि पहिलो पटक भएका हुन् । यसअघि तेहरान र वासिङ्टनबीच Joint Comprehensive Plan of Action को विकल्पबारे वार्ता हुँदै आएको थियो, जसबाट ट्रम्पले आफ्नो पहिलो कार्यकालमा बाहिरिने निर्णय गरेका थिए ।
