: बंगलादेशका नवनिर्वाचित प्रधानमन्त्री तारिक रहमानले आफ्नो सरकारको १८० दिने प्राथमिकता योजनाको रुपरेखा प्रस्तुत गरेका छन्।
सरकारको बुधबार बसेको पहिलो मन्त्रिपरिषद् बैठकले कानून र व्यवस्था, जीवनयापनको लागत, उपयोगिता र यातायातमा केन्द्रित प्रमुख लक्ष्यहरूको रूपरेखा प्रस्तुत गरेको हो।
यो योजना सार्वजनिक सुरक्षा सुधार गर्ने, आवश्यक वस्तुहरूको मूल्य नियन्त्रण गर्ने, निर्बाध बिजुली र ग्यास आपूर्ति सुनिश्चित गर्ने, जीवनयापन लागत घटाउने र सार्वजनिक यातायात, विशेष गरी रेलवे प्रणालीलाई सुदृढ पार्ने कुरामा केन्द्रित छ।
साथै प्रधानमन्त्ती रहमानले भ्रष्टाचार विरुद्ध लड्ने विषयमा पनि जोड दिएका छन्। मङ्गलबार देशको प्रधानमन्त्रीको रूपमा शपथ लिएका रहमानले प्रत्येक मन्त्रालयलाई १८० दिन भित्र आफ्नै योजना बनाउन र कार्यान्वयन गर्न निर्देशन दिए। यस अघि बङ्गलादेशमा नयाँ सरकारले पदभार ग्रहण गरे पछि एक सय दिनको प्राथमिकता प्याकेज घोषणा गर्ने गर्थे। तर रहमानले यसलाई तोड्दै १८० दिनको अवधि तय गरेका छन् ।
प्रधानमन्त्री तारिक रहमानको अध्यक्षतामा दिउँसो राजधानीको सचिवालयमा भएको बैठकमा मन्त्री, राज्यमन्त्री र सल्लाहकारहरूको उपस्थिति थियो।
फेब्रुअरी १२ मा भएको राष्ट्रिय संसदको चुनावमा भारी विजय हासिल गरेपछि बीएनपीले मंगलबार दुई दशकपछि नयाँ सरकार गठन गरेको छ। बीएनपीका अध्यक्ष तारिक रहमानको नेतृत्वमा रहेको नयाँ सरकारमा २५ अन्य मन्त्री र २४ राज्यमन्त्री छन्। प्रधानमन्त्रीले मंगलबार मन्त्री र राज्यमन्त्री सरहको १० सल्लाहकार पनि नियुक्त गरेका छन्।
