: नेपाल-चीन सीमा क्षेत्र सिन्धुपाल्चोकको तातोपानीमा बोलेरो दुर्घटना हुँदा एक जनाको मृत्यु भएको छ भने ७ जना घाइते भएका छन्।
कोदारी राजमार्गअन्तर्गत भोटेकोशी गाउँपालिकाको दशकिलोमा बा.प. १-०३० च ३४८० नम्बरको बोलेरो पार्किङमा राखिएको कन्टेनरको टेलरसँग ठोकिँदा दुर्घटना भएको प्रहरीले जनाएको छ। दुर्घटनामा बाह्रबिसे नगरपालिका-२ दुरुम्थलीका सुजन तामाङको घटनास्थलमै मृत्यु भएको इलाका प्रहरी कार्यालय बाह्रबिसेका प्रहरी निरीक्षक कृष्ण खड्काले बताए।
‘राति दुर्घटना भएको भन्ने खबर प्राप्त भएपछि हामी घटनास्थल पुगेका थियौं’, खड्काले भने- ‘घटना कसरी भयो भन्ने बारे अनुसन्धान भइरहेको छ।’ प्रहरीका अनुसार बोलेरोमा सवार ७ जना घाइते भएका छन्। तीमध्ये दुई जनाको अवस्था गम्भीर रहेको स्वास्थ्यकर्मीले बताएका छन्। घाइते सबैलाई उद्धार गरी उपचारका लागि खाडीचौरस्थित सिन्धु सदावहार अस्पताल र काभ्रेको धुलिखेल अस्पतालमा पठाइएको जिल्ला प्रहरी कार्यालय सिन्धुपाल्चोकले जनाएको छ।
स्थानीय ईश्वरलाल श्रेष्ठका अनुसार लिपिङदेखि लार्चासम्मको सडक भर अव्यवस्थित पार्किङ गरिराखेको कन्टेनरहरुकै कारण दुर्घटना भएको हो। ‘कहिँकतै ईमर्जेन्सी गाडीमा साइट दिनुपर्ने र रोक्नुपर्ने अवस्था आयो भने दुर्घटना हुने उच्च जोखिम छ’, उनले भने- ‘अव्यवस्थित पार्किङ गरेर राखिएको कन्टेनरहरू तुरुन्तै नहटाउने हो भने यो भन्दा ठूलो दुर्घटना हुने देखिन्छ।’
