: राष्ट्रिय प्रजातन्त्र पार्टीका अध्यक्ष राजेन्द्र लिङ्देनले देश चुनावमा होमिसकेकाले त्यसलाई आफ्नो पार्टीले अवसरका रुपमा उपयोग गर्ने बताएका छन् ।
चुनावी प्रचारप्रसारका क्रममा शनिबार नवलपरासी पुगेका अध्यक्ष लिङ्देनले जिल्लाको क्षेत्र नम्बर २ मा गरेको ‘रोड शो’ कार्यक्रम अन्तर्गत भेला भएका कार्यकर्तालाई सम्बोधन गर्दै उक्त कुरा बताएका हुन् । २०८४ मा हुने निर्वाचन अहिले गरिनु भनेको मुलुकलाई जटिलतातर्फ धकेल्ने काम भएको उनको भनाई थियो ।
‘हामीले सबै दल र शक्तिको सहकार्यमा नयाँ ढंगबाट मुलुकलाई अघि बढाउने प्रस्ताव राखेका थियौं तर त्यसलाई वास्ता नगरेर चुनाव घोषणा गरियो’, उनले भने । उनले अहिलेको निर्वाचनले समस्याको निकास नदिने दाबी गर्दै राप्रपाले यस चुनावबाट प्राप्त हुने जनसमर्थनलाई राष्ट्रिय सहमति निर्माण गर्ने अवसरका रुपमा उपयोग गर्ने बताए । जबरजस्त चुनाव गरिएको छ । यसले पनि पूर्ण निकास दिँदैन । तर राप्राले यो चुनानमार्फत प्राप्त शक्तिलाइ फेरि पनि देशमा राष्ट्रिय सहमति निर्माण गर्ने अवसरका रुपमा उपययोग गर्दै नयाँ ढंगबाट देशलाई अघि बढाउँछ’। अध्यक्ष लिङ्देनले भने ।
उनले कहिले प्रजातन्त्र कहिले लोकतन्त्र र कहिले गणतन्त्रका नाममा दुई दशकदेखि चलाइएको व्यवस्थाले भ्रष्टाचार र लुटतन्त्र निम्ताएकै कारण जेनजी आन्दोलन भएको बताए । अहिलेको चुनावले युवा पुस्ताको परिवर्तनको चाहनालाई पूरा नगर्ने उनको जिकिर थियो ।
जेनजीको परिवर्तनको चाहनालाई पूरा गर्न संविधान परिवर्तन आवश्यक रहेको उनको भनाई छ । ‘अब निर्वाचित हुने दलसहित युवा पुस्ता र सबै शक्तिको सहमतिबाट संविधान परिवर्तन गरी राजसंस्थासहित सनातन हिन्दु राष्ट्रको निर्माणले मात्र देशको निकास सम्भव छ’, उनको तर्क थियो ।
