— मेक्सिकोमा सेनाले सुरु गरेको ड्रग्स तस्करीविरुद्धको अपरेशनका क्रममा जेलिस्को न्यु जेनेरेशन कार्टेल (सिजेएनजी) प्रमुख नेमिसियो ओसेगुरा कार्भेन्टेसको मृत्यु भएको छ । ‘इल मेन्चो’ नामले चिनिने नेमेसियो विश्वकै कुख्यात ड्रग्स कारोबारीमध्ये एक मानिन्थे ।
प्रहरीसँगको झडपका क्रममा उनी मारिएका हुन् । पूर्व प्रहरी अधिकारी ओसेगुराको नेतृत्वमा सिजेएनजी मेक्सिकोभित्रैको शक्तिशाली र कठोर आपराधिक समुह बनेको थियो । मेक्सिकोको संघीय सुरक्षा बलले विभिन्न राज्यहरुमा अपरेशन सुरु गरेको थियो । त्यसक्रममा पश्चिमी राज्य जेलिस्कोस्थित तापाल्पामा चार सिजेएनजी सदस्यहरु मारिएको प्रैहरी जनाएको छ । यसक्रममा तीन प्रहरी पनि घाइते भएका छन् ।
यस राज्यका विभिन्न क्षेत्रमा दंगा भड्किएको थियो । नेमेसियो मारिएपछि उनीको सञ्जालका संदिग्ध ड्रग्स कारोबारीहरुले विभिन्न क्षेत्रमा हिंसा फैलाएको प्रहरीले जनाएको छ । उनीहरुले बस जलाउने तथा सुरक्षाकर्मीसँग भिडन्तमा उत्रने काम गरेका छन् ।
अमेरिकाको विदेश विभागले नयाँ सुचना जारी नभएसम्म आफ्ना नागरिकहरुलाई मेक्सिकोमै सुरक्षित बासस्थान वा होटलमा बस्न अपिल गरेको छ ।
यस अपरेशनलाई योजनावद्ध र सटिक तरिकाले सम्पन्न गरिएको मेक्सिकोको रक्षा मन्त्रालयले जनाएको छ । मेक्सिकन एयरफोर्सको विमान तथा नेशनल गार्डलाई पनि अपरेशनमा तैनाथ गरिएको थियो । यउसक्रममा ठूलो संख्यामा हतियारयुक्त गाडी जफत गरिएको मन्त्रालयले जनाएको छ ।
अमेरिकी अधिकारीहरुले महत्वपूर्ण सुचना दिएर सहयोग गरेको मेक्सिकोको राष्ट्रिय सुरक्षा कार्यालयले जनाएको छ । अमेरिकाका एक रक्षा अधिकारीले पनि अमेरिकी टास्क फोर्सले महत्वपूर्ण भूमिका खेलेको दाबी गरेका छन् । तर, बिस्तृत विवरण बाहिर आएको छैन । ५९ वर्षीय नेमेसियोबारे सुचना दिनेलाई १ करोड ५० लाख डलर दिइने घोषणा यसअघि अमेरिकी विदेश विभागले गरेको थियो ।
सन् २०१० मा जेलिस्कोबाट सिजेएनजी कार्टेल सुरु भएको थियो । अहिले मेक्सिकोभर यसको प्रभाव छ । यस समुहले अमेरिकामा पनि ठूलो परिमाणमा ड्रग्स आपुर्ति गर्ने गरेको छ । फेन्टानिलको उत्पादनबाट उसले खर्बौ आम्दानी गर्ने गर्छ ।
