— इरानसँग तनाव बढिरहेको वेला अमेरिकाले कतार र बहराइनमा राखिएका सैन्य बेसबाट सेना फिर्ता गरेको छ । न्युयोर्क टाइम्सका अनुसार अरब क्षेत्र हेर्न राखिएको प्रमुख सैन्य बेसको रुपमा रहेको कतारको अल उदेइद एयर बेस र बहराइनको अमेरिकी नेभीमा राखिएका सेनाहरू फिर्ता लगिएको हो ।
कतारको अल उदेइदमा मात्रै १० हजार सैनिक छन् । कतार र बहराइनमा झन्डै चार लाख नेपाली कार्यरत छन् । यी सेनालाई सहयोग गर्न नेपाली श्रमिकहरु पनि कार्यरत छन् ।
सम्बन्धित अधिकारीहरूले सैनिकको जोखिम घटाउन र आकस्मिक तनावको अवस्थामा सुरक्षा सुनिश्चित गर्न लागेको गल्फ टाइम्सले जनाएको छ ।
इरानले आफ्नो देशमा अमेरिकाले आक्रमण गरेमा उसका शैन्य शिविरमा पनि आक्रमण गर्ने चेतवानी दिइरहेको छ । अमेरिका र इरानबीचको तनावलाई घटाउन कतारले पनि कुटनीतिक पहल गरिरहेको छ ।
अरब क्षेत्रका सरकारहरूले यो स्थिति नजिकबाट नियालिरहेका बताउँदै तनाव नियन्त्रण गर्न पहल भइरहेको बताइरहेका छन् । उनीहरूका अनुसार अरब क्षेत्रमा तनाव बढ्दा स्थिरता, ऊर्जा बजार र अन्तर्राष्ट्रिय व्यापारमार्गहरू खतरामा पार्न सक्नेमा चिन्ता जनाइरहेका छन् ।
