— स्लोभाकियाका प्रधानमन्त्री रोबर्ट फिकोले युक्रेनमा आपतकालीन बिजुली आपुर्ति रोक्ने धम्की दिएका छन् । सोभियतकालीन द्रुज्बा पाइपलाईन क्रसिङबाट सोमबारसम्म स्लोभाकियामा रुसी तेल आपुर्ति हुनुपर्ने माग उनले राखेका छन् ।
उनले युक्रेनलाई मात्रै फाइदा हुनेगरी दुईपक्षीय सम्बन्ध बढाउन नसकिने बताए । शनिबार सामाजिक सञ्जाल प्लेटफर्म एक्समा उनले लेखेका छन्, ‘ यदी युक्रेनी राष्ट्रपतिले तेल आपुर्तिलाई सोमबारसम्म सुचारु गरेनन् भने त्यही दिन म सम्बन्धित स्लोभाक कम्पनीहरुलाई आपतकालीन बिजुली आपुर्ति रोक्न निर्देशन दिनेछु ।’
झन्डै एक महिनादेखि द्रुज्बा पाइपलाइन काटिएको छ । किभले रुसी ड्रोन आक्रमणबाट यो पइपलाईन क्षतिग्रस्त भएको बताएको छ । त्यस्तै, रुसले युक्रेनमाथि यस्तो आक्रमणको आरोप लगाएको छ । यो पाइपलाइनले रुसबाट युक्रेन हुँदै विभिन्न देशमा क्रुड तेल वितरण गर्छ ।
‘युक्रेनी राष्ट्रपतिले हाम्रो शान्तिवादी दृष्टिकोण बुझ्न अस्वीकार गर्छन् र हामी युद्धलाई समर्थन नगर्ने भएकाले स्लोभाकियाप्रति दुर्भावनापूर्ण व्यवहार गर्छन्,’ उनले लेखेका छन् ।
यसअघि क्षतिग्रस्त पाइपलाईन मर्मत नगरेसम्म युक्रेनलाई दिने भनिएको ९० अर्ब युरोको आपतकालीन ऋण रोक्ने धम्की हंगेरीले दिएको थियो ।
स्लोभाकिया र हंगेरी दुबै रूसी तेल प्रयोग गर्दै आएका छन् । मस्कोसँग उनीहरुको निकै राम्रो सम्बन्ध छ । रुसी आक्रमणले युक्रेनको उर्जा क्षेत्रमा ठूलो क्षति पुर्याएको छ । जसकारण, युक्रेनले स्लोभाकियाबाट आपतकालीन बिजुली निर्यात गरिरहेको छ ।
