— सोमालिल्यान्डको राष्ट्रपति कार्यालयका मन्त्री खादर हुसेन अब्दीले अमेरिकालाई खनिज र सैनिक अखडामा पहुँच दिन तयार रहेको बताएका छन् ।
‘हामी अमेरिकालाई हाम्रा खनिजहरूमा पहुँच दिन इच्छुक छौं । त्यस्तै अमेरिकाले हाम्रा सैन्य अखडा प्रयोग गर्नसक्छ,’ एएफपी समाचार एजेन्सीसँगको अन्तर्वार्तामा मन्त्री हुसेनले भने । अन्तर्राष्ट्रिय मान्यता प्राप्त गर्नका लागि यस्तो सहमति गर्न तयार रहेको उनले बताए ।
अमेरिकाले अझै पनि सोमालिल्यान्डलाई मान्यता दिएको छैन । सोमालिल्यान्डलाई स्वतन्त्र देशको मान्यता दिने इजरायल पहिलो देश हो । गत डिसेम्बरमा उसले सोमालिल्यान्डलाई मान्यता दिएको थियो ।
सन् १९९१ मा सोमालिल्यान्डले सोमालियाबाट अलग भएको घोषणा गरेको थियो । त्यसयता, यहाँ अलग सरकार छ । तर, सोमालियाले यसलाई आफ्नो अभिन्न क्षेत्र मान्दै आएको छ । सोमालियामा राष्ट्रपति सियाद बारेको झन्डै दुई दशक लामो कट्टरपन्थी शासनपछि गृहयुद्ध निम्तिएको थियो ।
त्यही समय उत्तरपश्चिमी क्षेत्र सोमालिल्यान्डले आफुलाई स्वतन्त्र घोषणा गर्यो । उत्तरतर्फको ठूलो भाग सेनाले ध्वस्त पारेका बेला सोमालिल्याण्डले आफुलाई स्वतन्त्र घोषणा गरेको थियो । यस्तो अराजकताबचि १९९० को दशकको अन्त्यतिर सोमालिल्यान्ड स्थिर थियो ।
आफ्नो क्षेत्रीय अखण्डता र एकतामाथि आक्रमण गर्दै ईजरायलले विभाजनलाई मान्यता दिएको सोमालियाको आरोप छ । सोमालियाको पक्षमा अधिकांश अफ्रिकी र अरब देशहरुले समर्थन गरेका छन् । उनीहरुले सोमालिल्यान्डलाई दिइएको मान्यता फिर्ता गर्न इजरायली प्रधानमन्त्री बेन्जामिन नेतान्याहूलाई दबाब दिइरहेका छन् ।
तर सोमालील्याण्डका नेता अब्दिरहमान मोहम्मद अब्दुल्लाही (सिरो) ले इजरायलको कूटनीतिक कदमको स्वागत गरेका छन् । नेतान्याहूले क्षेत्रीय स्थिरता र शान्ति प्रवद्र्धन गर्ने प्रतिबद्धता देखाएको दाबी उनले गरेका छन् ।
सिरोले हालैका इजरायललाई आफ्ना खनिज स्रोतहरूमा विशेष पहुँच प्रदान गर्न सकिने बताएका छन् । मन्त्री हुसेन अब्दीले इजरायललाई सैन्य उपस्थिति स्थापना गर्न अनुमति दिने सम्भावना कायमै रहेको बताए ।
सोमालिल्याण्डका अधिकारीहरूले आफ्नो देशमा लिथियम, कोल्टन र अन्य खनिज पाइने दाबी गरिरहेका छन् । यद्यपी, यसबारे धेरै अध्ययन भएको छैन ।
