: अमेरिकी राष्ट्रपति डोनाल्ड ट्रम्पको फ्लोरिडास्थित मार–ए–लागो रिसोर्टमा सुरक्षा घेरा तोड्ने युवक गोली हानी मारिएको छ। अमेरिकी सुरक्षाकर्मीले अनुसार आइतबार बिहान करिब १:३० बजेतिर ट्रम्पको निवास प्रवेश गरेका २१ वर्षीय अस्टिन टकर मार्टिन अमेरिकी सुरक्षाकर्मीले गोली हानी हत्या गरेका हुन् ।
उनी नर्थ क्यारोलिनाका बासिन्दा हुन् । घटना हुँदा राष्ट्रपति ट्रम्प वासिङ्टन डीसीमा थिए भने उनको परिवारका सदस्य फ्लोरिडास्थित घरमै थिए । उनीहरू सुरक्षित रहेको अधिकारीहरुले बताएका छन् ।
अमेरिकी सिक्रेट सर्भिसका अनुसार ती व्यक्ति शटगन र इन्धनको कन्टेनर बोकेका अवस्थामा भेटिएका थिए। सुरक्षाकर्मीले उनलाई हतियार छोड्न आदेश दिएपछि उनले इन्धनको कन्टेनर भुईंमा राखे पनि शटगन चलाउन खोजेपछि गोली चलाउनुपरेको पाम बीच काउन्टीका शेरिफ रिक ब्रेडशाले पत्रकार सम्मेलनमा जानकारी दिए ।
अन्तर्राष्ट्रिय सञ्चारमाध्यमअनुसार घटनाको कारणबारे हालसम्म केही खुलाइएको छैन। अनुसन्धानको जिम्मा एफबीआईले लिएको छ। एफबीआई निर्देशक क्यास पटेलले सामाजिक सञ्जालमार्फत आवश्यक सबै स्रोत परिचालन गरिएको बताएका छन्। उनले उत्तर गेट नजिकैबाट प्रवेश पाएको बताइएको छ, जहाँबाट एक पाहुना बाहिरिँदै गर्दा सुरक्षा चेकमा कमजोरी भएको हुनसक्ने प्रारम्भिक अनुमान गरिएको छ।
अधिकारीहरूले उनी आफ्नो गृह राज्यबाट फ्लोरिडा जाँदै गर्दा हतियार किनेको हो वा होइन भन्ने विषयमा अनुसन्धान गरिरहेका छन्। उनका परिवारले शनिबार उनी हराएको जानकारी दिएको बताइएको छ।
अमेरिकामा पछिल्लो समय राजनीतिक हिंसाका घटना बढ्दै गएका बेला यो घटना भएको हो। सन् २०२४ मा पेन्सिल्भेनियामा भएको चुनावी सभामा ट्रम्पमाथि गोली प्रहार भएको थियो भने फ्लोरिडाको वेस्ट पाम बीचस्थित गल्फ कोर्समा पनि उनीमाथि आक्रमणको प्रयास भएको थियो। यस घटनाबारे थप अनुसन्धान जारी रहेको अधिकारीहरूले बताएका छन्।
