— नेपाली राष्ट्रिय महिला फुटबल टोलीकी स्टार स्ट्राइकर सावित्रा भण्डारी ‘साम्बा’ ले न्युजिल्याण्डबाट आफ्नो उपचारका लागि आर्थिक सहयोगको अपिल गरेकी छन् । साम्बा सिजन २०२५–२६ का लागि गत साउनमा न्युजिल्याण्डको वेलिङ्टन फोनिक्ससँग आबद्ध भएकी थिइन् ।
गत पुस ५ गते अस्ट्रेलियाको महिला फुटबल लिगमा ब्रिस्बेन रोअरविरुद्धको खेलको दोस्रो हाफमा उनी घाइते भइन् । हावामा उडिरहेको बललाई हेड हान्ने क्रममा साम्बा र रोअरकी गोलकिपर ठोक्किँदा उनको दाहिने घुँडामा गम्भीर चोट लाग्न पुगेको थियो ।
चोटको अवस्था गम्भीर भएकाले जटिल शल्यक्रिया आवश्यक परेको र हालसम्म शल्यक्रिया हुन नसकेको उनले बताएकी छन् । प्रारम्भिक अनुमान अनुसार उपचारमा करिब ८० हजार अमेरिकी डलर (नेपाली १ करोड १५ लाख रुपैयाँ बढी) खर्च लाग्ने सम्भावना रहेको उनले बताएकी छन् ।
साम्बाले फेसबुकमार्फत समर्थकहरूलाई सम्बोधन गर्दै भनेकी छन्, ‘म चोटपछिको उपचारका लागि भौंतारिरहेकी छु । अहिले ७ हप्तादेखि मैदानबाहिर छु । घुँडाको एसीएलमा पहिलेको शल्यक्रियामा राखिएको ग्राफ्ट र एमसीएल दुवैमा चोट लागेको छ । यसपटक पुनः जटिल शल्यक्रियाको आवश्यकता परेकाले आर्थिक सहयोगको अपिल गर्नु परेको हो ।’
साम्बाले एन्फा नेतृत्वप्रति पनि गम्भीर गुनासो गरेकी छन् । उनले भनेकी छन्, ‘पहिले एन्फाको पहलमा मेरो उपचारमा सम्पूर्ण व्यवस्थापन र सहयोग भएको थियो । त्यसबेला आर्थिक र मानसिक समस्या थिएन, जसका कारण समयमै मैदानमा फर्कन सकेँ । तर यसपटक एन्फाबाट वाचा गरेको सहयोग पाइएन । चोट लागेको ३ सातापछि मात्र क्लबको पहलमा शल्यक्रियाको मिति तोकियो, तर एन्फाले आफ्ना तर्फबाट प्रक्रिया अघि बढाएन ।
उनले यो आफ्नो करियरको सबैभन्दा कठिन लडाइँ भएको पनि बताएकी छन् । ‘अघिल्लो साता एन्फा अध्यक्ष आफैंले प्रशासनिक सहयोग गर्न नसकिने जानकारी दिनुभयो । उहाँले नगद ५ लाख मात्र सहयोग गर्ने र अन्य प्रक्रिया आफैं गर्न भन्नुभयो,’ उनले भनिन्, ‘यसले मेरो पहिलाको प्रक्रिया रोकियो र झन्डै २ महिनापछि मात्र शल्यक्रियाको मितिका लागि फेरि प्रयास गर्नुपर्यो ।’
साम्बाका अनुसार क्लब न्युजिल्याण्डकै अस्पतालमा उपचार गराउन तयार छ । तर चोट गम्भीर भएको र अघिल्लो पटक कतारको अस्पेटारमा गरिएको उपचार उच्च स्तरको भएकाले त्यही अस्पतालमा पुनः उपचार गराउन चाहेको उनले बताएकी छन् । बिमाबाट प्राप्त रकम शल्यक्रिया र ७–८ महिनाको ‘रिह्याब’मा अपुग हुने भएकाले समर्थकको सहयोग अनिवार्य भएको उनले बताइन् ।
साम्बाले आफू बाहिर रहेकाले सरकारी प्रक्रियामा ढिलाइ भएको र आफैंले शल्यक्रिया नगरी बस्न नसक्ने बताइन् । उनले भनिन्, ‘म राष्ट्रिय टोलीको कप्तान हुँ र देशका लागि खेल्दै आएकी छु । मैले यो परिस्थितिको सामना गर्नुपर्छ भने सोच्नुहोस्, अरु खेलाडीको अवस्था के होला ?’ उनले निरन्तर आवाज उठाउँदै आएको तर नियतिले कठिन अवस्थामा ल्याएको पनि बताएकी छन् ।
‘मैले यो अवस्था आउला भन्ने सोचेको पनि थिइनँ । आफ्नो अभिभावक मानेको एन्फाले पनि पछि हटेपछि मेरो साथ दिन आम समर्थकहरू नै हुनुहुन्छ । एन्फाभित्र म क्लबको लागि खेल्दा चोट लागेको भन्ने तर्क सुन्दा म आफैं निराश भएको छु,’ उनले भनेकी छन्, ‘मैले देशका लागि सधैं शत प्रतिशत दिएको छु र आउने दिनमा पनि देशका लागि खेल्न तत्पर छु ।’
उनले इजरायल होस् वा फ्रान्स, आफू सधैं नेपालकै नाम राखेर खेलेको महसुस गरेको बताइन् । न्युजिल्याण्ड र अस्ट्रेलियामा व्यक्तिगत स्तरको भन्दा राष्ट्रको पहिचानलाई प्राथमिकता दिएको उनले बताइन् ।
साम्बाले साहसका साथ उठ्न समर्थकको साथ सहयोग चाहिने बताएकी छन् । ‘मेरो उपचारका लागि आवश्यक रकम जुटाउन तपाईंहरूको सहयोग आवश्यक छ । आशा छ, मेरो उपचारका लागि आवश्यक सहयोग चाँडै जुट्नेछ ।’
