: बेलायतका भूतपूर्व मन्त्री लर्ड पिटर म्यान्डेलसन पक्राउ परेको केही घण्टामै जमानतमा रिहा भएका छन्। उनलाई सार्वजनिक पदमा रहँदा पदीय दुरुपयोग गरेको आरोपमा सोमबार लन्डनस्थित उनकै घरबाट प्रहरीले नियन्त्रणमा लिएको थियो ।
मन्त्री पदमा रहँदा उनले यौन दुराचारमा दोषी ठहरिएका अमेरिकी व्यवसायी जेफ्री एप्स्टिनलाई सरकारका संवेदनशील र बजारलाई प्रभाव पार्ने खालका जानकारीहरू दिएको आरोप छ। सन् २००९ का केही इमेलहरूमा उनले तत्कालीन प्रधानमन्त्रीका सल्लाहकारले तयार पारेका 'सम्पत्ति बिक्री' सम्बन्धी नीतिगत योजनाहरू एप्स्टिनलाई पठाएको देखिएको छ।
प्रधानमन्त्री सर कियर स्टारमरले राजदूत नियुक्ति प्रक्रियाका क्रममा म्यान्डेलसनले आफ्नो र एप्स्टिनको सम्बन्धबारे ढाँटेको दाबी गरेका छन्।
फेब्रुअरी २०२५ मा अमेरिकाका लागि बेलायती राजदूत नियुक्त भएका म्यान्डेलसनलाई एप्स्टिनसँगको सम्बन्ध बाहिरिएपछि सेप्टेम्बरमा बर्खास्त गरिएको थियो।
अमेरिकी न्याय मन्त्रालयले इमेलहरू सार्वजनिक गरेपछि यसै महिना उनीमाथि औपचारिक अनुसन्धान सुरु भएको हो। उनले आफूले कुनै आपराधिक काम नगरेको र आर्थिक लाभ लिने उद्देश्य नरहेको बताउँदै आएका छन्।
