— कांग्रेसको सुरक्षित क्षेत्रका रुपमा रहेको पूर्वी नवलपरासी क्षेत्र नम्बर–१, मा यसपटक प्रतिस्पर्धा रोचक बनेको छ । कांग्रेस नेता शशांक कोइरालाले लगातार विजय हाासिल गर्दै आएको क्षेत्रमा यसपटक एमाले र रास्वपा पनि कडा प्रतिस्पर्धामा छन् । एमाले र रास्वपा कांग्रेसको विजय यात्रामा ‘ब्रेक’ लाउने कोसिसमा छन् ।
यसअघि चार पटकसम्म कोइरालाले यही क्षेत्रबाट निर्वाचन जितेका थिए । उनलाई जित हाासिल गर्न धेरै मेहनत गर्नु पर्थेन । यसपटक कोइराला चुनावी मैदानमा छैनन् । कांग्रेसबाट नवलपुर जिल्ला उपसभापति बालकृष्ण घिमिरे प्रतिस्पर्धामा उत्रिएका छन् ।
१८ वर्षदेखि बीपी पुत्रले जित्दै आएको यस क्षेत्रमा उनको विरासत जोगाउने अभिभारा प्राध्यापक तथा अभिवक्ता घिमिरेको काँधमा आइपरेको छ । अहिले क्षेत्रभरि कांग्रेस विरासत भत्किएला कि जोगिएला भन्ने चासो छ ।
यसपटक कोइराला उम्मेदवार नहुँदा एमाले, रास्वपा, नेकपालगायत प्रतिस्पर्धी दल ‘कांग्रेस किल्ला’ भत्काउने दाउमा छन् । टिकट वितरणका क्रममा देखिएको विवाद समाधान गरेर पार्टी एकजुट भएर चुनावी प्रतिस्पर्धामा होमिएको दाबी कांग्रेसले गरिरहेको छ ।
२०६४ सालको पहिलो संविधानसभा सदस्य निर्वाचनदेखि ०७९ सम्म कोइरालाले यही क्षेत्र यहाँबाट लगातार जितेका थिए । यसपटक उम्मेदवार बनेका घिमिरे पनि स्थानीय स्तरमा भिजेका र संगठनमा पकड भएका नेता मानिन्छन् । तर, कोइरालाको जस्तो पारिवारिक विरासत नहुनु घिमिरेका लागि चुनौती हुन सक्ने यहाँका अगुवा बताउँछन् । कांग्रेसले जिल्लाले लामो समयदेखि स्थानीय उम्मेदवार हुनु पर्ने माग गरिरहेको थियो । यसपटक जिल्लाकै बासिन्दा उम्मेदवार भए पनि घिमिरिेलाई नयाँ दलको प्रभाव चिरेर जानुपर्ने चुनौती रहेको छ ।
अहिले यस क्षेत्रमा रास्वपाबाट राजन गौतम उम्मेदवार छन् । उनी ०७९ मा पनि रास्वपाबाटै उम्मेदवार रहेका थिए । गौतमबाहेक सबै नयाँ उम्मेदवार हुन् । रास्वपा गण्डकी प्रदेश सभापति गौतमले यस अगाडिको चुनावमा संगठन कमजोर हुँदा पनि २४ हजार बढीले विश्वास गरेको बताए । अहिले संगठन मजबुत भएकाले आफ्नो जित सुनिश्चित रहेको दाबी गरे ।
०७९ मा कोइरालाले २७ हजार ६७, एमालेका कृष्णप्रसाद पौडेलले २५ हजार ४७ र गौतमले २४ हजार ३ सय ५ मत प्राप्त गरेका थिए । कोइरालाले एमाले उम्मेदवारलाई २ हजार २० मतान्तरले पराजित गरेका थिए । दोस्रो स्थानको एमाले र रास्वपाबीच ७ सय ४२ मतको मात्र अन्तर थियो ।
एमालेले व्यावसायिक पृष्ठभूमिका भागिरथ सापकोटालाई उम्मेदवार बनाएको छ । सापकोटाले आफूसँग आर्थिक समृद्धि र विकासको स्पष्ट खाका भएकाले जनताले आफूलाई विश्वास गर्ने दाबी गरिरहेका छन् । प्रतिस्पर्धामा रहेका दल र स्वतन्त्र उम्मेदवार अहिले घरदैलोमा व्यस्त रहेका छन् ।
