: अमेरिकाले इरानले आफ्नो परमाणु कार्यक्रमलाई पुन:सक्रिय बनाउन खोजिरहेको दाबी गरेको छ। गत वर्षको जुन महिनामा अमेरिकी नेतृत्वमा भएको आक्रमणपछि इरानले आफ्ना परमाणु संयन्त्रहरूलाई फेरि बनाउने प्रयास गरिरहेको अमेरिकी उपराष्ट्रपति जेडी भेन्सले बताएका छन् ।
भेन्सले पत्रकारहरूसँग कुरा गर्दै भने, 'हाम्रो सिद्धान्त प्रष्ट छ- इरानसँग परमाणु हतियार हुनुहुँदैन। यदि उनीहरूले परमाणु हतियार बनाउने प्रयास गरे भने त्यो अमेरिकाका लागि ठुलो समस्या हुनेछ। वास्तवमा, उनीहरूले यस्तो प्रयास गरिरहेको केही प्रमाणहरू हामीले फेला पारेका छौँ।'
उपराष्ट्रपति भेन्सको यस्तो अभिव्यक्ती बिहीबार जेनेभामा दुवै देशका प्रतिनिधिमण्डलबीच इरानको परमाणु कार्यक्रमबारे महत्त्वपूर्ण वार्ताको तयारी भइरहेको समयमा आएको हो।
जेनेभा वार्तामा राष्ट्रपति डोनाल्ड ट्रम्पका विशेष दूत स्टिभ विटकोफ र ट्रम्पका ज्वाइँ जेरेड कुश्नर पनि सहभागी हुने भेन्सले जानकारी दिए।
भेन्सका अनुसार राष्ट्रपति ट्रम्प इरानको परमाणु मुद्दालाई 'कूटनीतिक माध्यम' बाटै सुल्झाउन चाहन्छन्। तर, यदि कूटनीति विफल भयो भने राष्ट्रपतिसँग 'अन्य विकल्पहरू' पनि खुला रहेको उनले चेतावनी दिएका छन्।
