: प्रधानमन्त्री सुशीला कार्कीले गौरीबहादुर कार्की आयोगको प्रतिवेदन बुझाउनसाथ कार्यान्वयन गरिने बताएकी छन्। सञ्चारकर्मीहरूको प्रश्नको जवाफ दिँदै प्रधानमन्त्री कार्कीले अन्य कुनै प्रतिवेदन भए पनि सार्वजनिक गरिदिने बताइन्।
'आयोगले प्रतिवेदन बुझाउनासाथ कार्यान्वयनमा जान्छ। मैले भन्दै आएकी छु, मुलुकमा कुनै पनि प्रकारको दण्डहीनताले ठाउँ पाउनुहुँदैन। त्यसैले अहिलेको आयोगको मात्र होइन, अरु पनि त्यस्ता प्रतिवेदन छन् भने ती हेर्छौँ र सार्वजनिक गरिदिन्छौँ। ताकि जनताले थाहा पाऊन्,' उनले भनेकी छन्।
उनले निर्वाचनमा सफलतापूर्वक सम्पन्न भएकोमा खुसी व्यक्ति गर्दै यसका लागि सम्पूर्ण टिमको मेहनत र परिश्रम रहेको बताइन्। उनले जेनजीले उठाएका मागहरू अब बन्ने सरकारले सम्बोधन गर्नुपर्ने बताइन्।
'मुलुकका समस्याप्रति सबै जानकार छन्। सबैले समस्या देखेका छन् तर तिनको समाधानमा इमानदार प्रयास आवश्यक छ। जेनजीले उठाएका मागहरु छन्। तिनको सम्बोधन गर्नुपर्छ। जस्तो कि देशमा सुशासन होस्, स्वदेशमै बस्न पाइयोस्। यहीँ काम पाइयोस्। भ्रष्टाचार, विभेद र पक्षपात नहोस्। विदेशमा लास बनेर फर्किनुपर्ने अवस्थाको अन्त्य होस्। देशभित्रै गुणस्तरीय शिक्षा पढ्न पाऊन् युवाले। संविधानसम्मत मौलिक हकको अक्षरशः पालना होस्। हामीले के गर्न खोजेका थियौँ, के सम्भव भयो, के अधुरो रह्यो र के काम के कारणले सम्भव हुन सकेन भन्ने विषयमा श्वेतपत्र नै छाडेर जान्छौँ। ताकि आगामी सरकारलाई मार्गदर्शन होस्,' उनले भनेकी छन्।
