: हरेक निर्वाचनमा नयाँ अनुहार निर्वाचित गर्ने भक्तपुर-२ ले उम्मेदवारसँगै यसपटक भने दल पनि नयाँ रोजेको छ। राष्ट्रिय स्वतन्त्र पार्टी (रास्वपा)का उम्मेदवार राजीव खत्री भक्तपुर-२ मा भारी मतान्तरले विजयी भएका छन्। रास्वपाका खत्री ४२ हजार ३ सय ३४ सहित विजयी हुँदा नेकपा एमालेका महेश बस्नेत १० हजार ९ सय ९६ मा सीमित रहे।
नेपाली कांग्रेसका कविर राणा ८ हजार ४ सय १, नेकपाका रामप्रसाद सापकोटा १ हजार ३ सय २३ र नेमकिपाका रमेश वैद्य ३ हजार ७ सय ५३ ले मत पाएका छन्। २०७४ को निर्वाचनमा नेपाली कांग्रेसका उम्मेदवार दमननाथ ढुंगानालाई करिब १८ हजार मतान्तरले पछि पार्दै विजय हात पारेका नेकपा एमालेका उम्मेदवार पूर्वमन्त्री महेश बस्नेतले यसपटक भने ११ हजार मत पनि पाउन सकेनन्।
भक्तपुर-२ मा ९८ हजार ३ सय ५२ मतदाता रहेकोमा ७३.२१ प्रतिशत अर्थात ७२ हजार ५ मत मात्र खसेको थियो।
को हुन खत्री ?
भोजपुर स्थायी घर भएका खत्री काठमाडौं-४ का मतदाता हुन्। ३९ वर्षीय खत्रीले दुई दशक पत्रकारिताको अनुभव संगालेका छन्। पत्रकारिता त्यागेर केही महिना अघि मात्र रास्वपामा लागेको घोषणा गरेका उनलाई पार्टी सभापतिले काठमाडौंबाट लड्न भने पनि उनले भक्तपुर-२ रोजेका थिए।
पुरानाहरुले देश बिगारेका कारण आफू राजनीतिमा आउनु परेको बताउने खत्री अब जेन-जी आन्दोलनका शहीदको सपना पूरा गर्न पुरै इमान्दारीपूर्वक लाग्ने उनी बताउँछन्। भक्तपुर-२ बाट निर्वाचित भएपछि अब भक्तपुरमै बसाई सर्ने पनि उनले योजना बनाएका छन्।
