— चलचित्र विकास बोर्डले कान्स फिल्म फेस्टिभलको ७९ औं संस्करणमा सहभागिता जनाउने भएको छ । पर्यटन बोर्डसँगको सहकार्यमा फेस्टिभलमा नेपालको एक स्टल (बुथ) पनि राखिने बोर्डले जानकारी दिएको हो ।
नेपालको चलचित्र क्षेत्रको प्रवर्द्धन, अन्तर्राष्ट्रिय सहकार्य तथा नेपाली चलचित्र र चलचित्रकर्मीहरूलाई विश्वस्तरमा पहुँच दिलाउने उद्देश्यका साथ बोर्डले नेपालको तर्फबाट औपचारिक सहभागिता जनाउन लागेको बोर्ड अध्यक्ष दिनेश डिसीले जनाए । '
'नेपाली फिल्म उद्योगको ब्रान्डिङ गर्ने उदेश्यले स्टल राख्ने भएका छौं । नेपालबाट यो महोत्सवमा जाने फिल्मकर्मीले आफ्नो फिल्मको प्रचार गर्न यो बुथ प्रयोग गर्न पाउनेछ,' डीसीले भने ।
बोर्डको यो स्टलमार्फत फिल्मकर्मीले आफ्नो चलचित्र, पोस्टर, ट्रेलर तथा अन्य प्रचार सामग्री अन्तर्राष्ट्रिय दर्शक, वितरक तथा सहकार्यकर्तासमक्ष प्रदर्शन तथा प्रचार–प्रसार गर्न पाउने बताइएको छ । यो स्टल प्रयोग गर्न चाहने फिल्मकर्मीलाई बोर्डले समन्वयनको आह्रवानसमेत गरेको छ । यो महोत्सव आगामी मे १२ देखि २३ सम्म फ्रान्सको कान्स सहरमा आयोजना हुनेछ ।
कान्समा बोर्ड पहिलोपटक यसरी सहभागी भएको पनि डीसीले दाबी गरे । 'यसअघि मीन भाम, दीपक रौनियारले आफ्नो तरिकाले नेपाली फिल्मको पहुँच यस्तो महोत्सवमा पुर्याए । तर, पहिलो पटक कान्समा बोर्डले यसरी बुथ राख्ने भएको हो,' उनले भने । यसअघि बोर्डले गोवा फिल्म महोत्सवमा स्टल राखेको थियो । यो वर्ष बुसानमा पनि बोर्डले स्टल राख्ने भनिएको थियो, तर जेन-जी आन्दोलनका कारण बोर्डले प्रतिनिधित्व जनाउन पाएन ।
