: सुनसरीको धरानमा प्रतिबन्धित लागूऔषधसहित चार जनालाई प्रहरीले पक्राउ गरेको छ । धरान उपमहानगरपालिका–६ पानबारीस्थित सुकुम्बासी टोल क्षेत्रमा प्रहरी चौकी पानबारीबाट खटिएको प्रहरी टोलीले चेकजाँच गर्ने क्रममा उनीहरूलाई नियन्त्रणमा लिएको इलाका प्रहरी कार्यालय धरानका डिएसपी भीषणबाबू राईले बताए ।
पक्राउ पर्नेहरूमा धरान–६ का २७ वर्षीय युबराज लिम्बु, २० वर्षीय उत्सब बिक, २६ वर्षीय सौगात कटुवाल र २६ वर्षीय रुपेश राई रहेका छन् । प्रहरीले उनीहरूको साथबाट प्रतिबन्धित लागूऔषध ट्रामोल २४० क्याप्सुल र डिकोलिक २३५ ट्याब्लेट बरामद गरेको डिएसपी राईले बताए । पक्राउ परेका चारै जनालाई लागूऔषधसहित नियन्त्रणमा लिई इलाका प्रहरी कार्यालय धरानमा राखेर थप अनुसन्धान भइरहेको उनले बताए ।
