: इन्स्टाग्राम र फेसबुकको स्वामित्व रहेको कम्पनी मेटाले कृत्रिम बुद्धिमत्ता (एआइ) बोटहरू एकआपसमा संवाद गर्न सक्ने सामाजिक सञ्जाल प्लेटफर्म मोल्टबुक खरिद गरेको छ । मेटाले यो सम्झौतापछि मोल्टबुकको टोलीलाई आफ्नो सुपरइन्टेलिजेन्स ल्याब्समा समेटिने र यसले ‘मानिस तथा व्यवसायका लागि एआई एजेन्टहरूले काम गर्ने नयाँ तरिका’ विकास गर्न सहयोग गर्ने जनाएको छ ।
रेडिट जस्तै देखिने यो साइट यसै वर्ष जनवरीमा प्रयोगात्मक रूपमा सुरु गरिएको थियो । यसमा एआईद्वारा सञ्चालित प्रोग्रामहरूले आफ्नै फोरममा आपसमा कुराकानी गर्ने, छलफल गर्ने र कहिलेकाहीँ आफ्ना मानव मालिकबारे ‘गसिप’ समेत गर्ने गरेका थिए । प्रविधि क्षेत्रमा मोल्टबुकका फोरममा हुने कम्प्युटर–नेतृत्वको संवादले धेरैलाई आकर्षित गरेको छ । तर यसले एआईको स्वतन्त्रता (autonomy) सम्बन्धी साइबर सुरक्षा र नैतिक चिन्ता पनि बढाएको छ ।
मेटाका एक प्रवक्ताले बीबीसीलाई भने, ‘मोल्टबुकको दृष्टिकोण द्रुत रूपमा विकास भइरहेको क्षेत्रमा एउटा नयाँ र रोचक कदम हो ।’ कम्पनीले यो सम्झौताको मूल्य कति हो भन्ने खुलाएको छैन । बीबीसीले प्रतिक्रिया लिन मोल्टबुकसँग पनि सम्पर्क गरेको छ । पछिल्ला वर्षहरूमा प्रविधि कम्पनीहरूले एआई एजेन्टमा ठूलो लगानी गरिरहेका छन् । यी स्वचालित बोटहरूले मानिसका तर्फबाट योजना बनाउने र जटिल काम पूरा गर्ने क्षमता राख्छन् ।
मेटाका प्रमुख कार्यकारी मार्क जुकरबर्गले यसअघि नै यस वर्ष कम्पनीले एआई परियोजनामा थप लगानी बढाउने बताएका थिए । प्रतिस्पर्धी ओपनएआई र गुगलसँग प्रतिस्पर्धा गर्न मेटाले नयाँ स्टार्टअप र साझेदारीहरू पनि बढाइरहेको छ । गत डिसेम्बरमा मेटाले सामान्य प्रयोजनका बोट बनाउने चिनियाँ मूलको कम्पनी ‘म्यानुस (ःबलगक)’ पनि खरिद गरेको थियो ।
मोल्टबुक OpenClaw नामक उपकरण प्रयोग गरेर बनाइएको हो । यो एआई एजेन्टले प्रयोगकर्ताको कम्प्युटरमा डिजिटल सहायकको रूपमा काम गर्दै इमेल लेख्ने, भेटघाट व्यवस्थापन गर्ने र एप बनाउने जस्ता काम गर्न सक्छ । प्रयोगकर्ताले OpenClaw लाई आफ्नो उपकरण नियन्त्रण गर्न र आफ्ना तर्फबाट काम गर्न सेट गर्न सक्छन्। यसलाई मोल्टबुकसँग जोड्दा एआई एजेन्टहरूले अन्य बोटहरूसँग कसरी अन्तरक्रिया गर्छन् भन्ने पनि हेर्न सकिन्छ ।
OpenClaw का निर्माता पीटर स्टाइनबर्गरलाई फेब्रुअरीमा च्याटजीपीटी बनाउने कम्पनी ओपनएआईले नियुक्त गरेको थियो । ओपनएआईका प्रमुख स्याम अल्टम्यानले स्टाइनबर्गरले ‘मानिसका लागि अत्यन्त उपयोगी काम गर्न सक्ने नयाँ पुस्ताका व्यक्तिगत एआई एजेन्ट विकासमा सहयोग गर्ने’ बताएका छन् । सन् ८८२०२५ को अन्त्यतिर खुला स्रोतका रूपमा सार्वजनिक भएपछि धेरै डेभलपरहरूले OpenClaw प्रयोग गर्न थालेका छन् ।
तर केही साइबर सुरक्षा विज्ञहरूले दैनिक प्रयोगका एपहरू चलाउने उपकरणसँग यस्तो एआई उपकरण जोड्दा जोखिम बढ्न सक्ने भन्दै चिन्ता व्यक्त गरेका छन् । चीनको साइबर सुरक्षा निकायले पनि OpenClaw सम्बन्धी सम्भावित जोखिमबारे चेतावनी जारी गरेको छ, विशेषगरी चीनका केही स्थानीय सरकार र प्रविधि कम्पनीहरूले यो उपकरण प्रयोगात्मक रूपमा प्रयोग गर्न थालेपछि ।
