: अमेरिकी केन्द्रीय कमाण्डले अमेरिकाले गरेको आक्रमणपछि विष्फोट भएका इरानी नौसैनिक जहाजहरूको भिडियो सार्वजनिक गरेको छ ।
कमाण्डका अनुसार मंगलबार होर्मुज जलडमरु नजिक रहेका १६ वटा इरानी ‘माइन–लेयर’ जहाजलाई लक्ष्य बनाउँदै आक्रमण गरिएको थियो र ती सबै नष्ट गरिएको दाबी गरिएको छ । पेन्टागनमा सोमबार आयोजित पत्रकार सम्मेलनमा अमेरिकी संयुक्त चीफ्स अफ स्टाफका अध्यक्ष जनरल ड्यान केनले ‘अपरेसन एपिक फ्युरी’ अन्तर्गत इरानको नौसैनिक शक्ति ध्वस्त पार्नु तीन प्रमुख उद्देश्यमध्ये एक रहेको बताएका थिए ।
यसअघि अमेरिकी राष्ट्रपति डोनाल्ड ट्रम्पले होर्मुज जलडमरुमा माइन राख्ने प्रयास गर्ने कुनै पनि इरानी जहाजलाई नष्ट गरिने चेतावनी दिएका थिए । मध्यपूर्वको अत्यन्त महत्वपूर्ण अन्तर्राष्ट्रिय जलमार्ग मानिने यो क्षेत्रबाट विश्वका धेरै तेल र सामान बोकेका जहाजहरू आवत–जावत गर्छन् । कमाण्डले एक्समा सार्वजनिक गरेको भिडियोमा विभिन्न आकारका जहाजहरू प्रहारपछि विस्फोट भएर नष्ट भएको देखिन्छ ।
होर्मुज जलडमरुमा कार्गो जहाजमा आक्रमण
यसैबीच बेलायती यूके म्यारिटाइम ट्रेड अपरेसनका अनुसार होर्मुज जलडमरुमा एउटा कार्गो जहाज अज्ञात प्रहारपछि आगलागी भएको छ । ओमानको उत्तरतर्फ करिब ११ समुद्री माइल दूरीमा रहेको स्थानमा बिहान ०४ः३५ मा घटना भएको बताइएको छ । जहाजमा आगलागी भएपछि त्यसलाई खाली गराइएको छ ।
UKMTO ले यसअघि पनि सोही क्षेत्रमा एउटा कन्टेनर जहाजमाथि अज्ञात प्रहार भएको अर्को घटना रिपोर्ट गरेको थियो । घटनापछि सो क्षेत्रबाट यात्रा गर्ने जहाजहरूलाई सावधानी अपनाउन सल्लाह दिइएको छ ।
इरानद्वारा मध्यपूर्वका अमेरिकी आधारमा क्षेप्यास्त्र आक्रमण
इरानको इस्लामिक रिभोलुसनरी गार्ड कप्र्सका अनुसार इरानले मध्यपूर्वका विभिन्न अमेरिकी सैन्य आधारहरूमा क्षेप्यास्त्र प्रहार गरेको छ । राज्य सञ्चारमाध्यम ISNA ले साझा गरेको विज्ञप्तिअनुसार कतारको अल उदैद, कुवेतको क्याम्प अरिफजान र इराकको हरिरस्थित अमेरिकी सैन्य आधार लक्ष्य बनाइएका छन् ।
विज्ञप्तिमा क्षेत्रस्थित अमेरिकी पाँचौं नौसैनिक फ्लीटलाई पनि निशाना बनाइएको र अमेरिकी सेनाको ‘सञ्चालन संरचना’ नष्ट गरिएको दाबी गरिएको छ । इरानी पक्षले यसलाई युद्ध सुरु भएयताकै सबैभन्दा ठूलो र भीषण सैन्य अपरेसन भएको दाबी गरेको छ । हालसम्म अमेरिकी अधिकारीहरूले यी आक्रमणबारे औपचारिक प्रतिक्रिया दिएका छैनन् ।
