— मकवानपुरको दुर्गम गाउँमा आधारभूत अस्पताल भवन निर्माण सम्पन्न गरिएको छ । कैलाश गाउँपालिका–३ कालिकाटारमा निर्माण भएको बीपी स्मृति कैलाश आधारभूत अस्पताल भवनको बागमती प्रदेशका मुख्यमन्त्री इन्द्रबहादुर बानियाले बुधबार एक समारोहबीच उद्घाटन गरेका छन् ।
संघीय सरकारको ६ करोड ५८ लाख ९९ हजार १ सय ७६ रुपैयाँ खर्चमा निर्माण गरिएको अढाई तले अस्पतालमा १० शय्या रहेको छ । २ जना चिकित्सकसहित २२ जनाको दरबन्दी रहेको छ । अस्पतालमा ५ जना स्टाफ नर्स, २ जना अनमि, ३ जना हेल्थ असिस्टेन्ट, २ जना अहेव, १ जना कविराज, १ जना ल्याव टेक्निसियन, १ जना रेडियोग्राफर, १ जना फार्मेसी सहायक, १ जना डेन्टल हाइजिनिक, १ जना नासु, २ जना कार्यालय सहयोगी, १ जना सरसफाइकर्मी र एक जना सुरक्षाकर्मी रहेका छन् । दरबन्दी अनुसार पदपूर्तिका लागि सार्वजनिक सूचना गरिएको छ । उक्त भवनबाट अहिले स्वास्थ्य चौकीले दिने स्वास्थ्य सुविधामात्र उपलब्ध गराइएको स्वास्थ्य शाखा प्रमुख तिलकप्रसाद गौतमले बताए ।
दरबन्दी परिपूर्ति भएपश्चात् अस्पतालमा इमरजेन्सी सेवासहित स्त्ररोग, बालरोग, दन्तरोग, छाला रोग, आयुर्वेद, आँखाजाँच, प्रयोगशाला, भिडियो एक्स–रे, इसिजी लगायतका सेवा उपलब्ध हुने उनले बताए । २१ हजार ८ सय ५६ जनसंख्या रहेको कैलाश गाउँपालिका मकवानपुर सदरमुकाम हेटौंडाबाट ४५ किलोमिटरको दूरीमा रहेको छ ।
चेपाङ समुदायको बाहुल्य रहेको यो पालिका जिल्लामै स्वास्थ्य सुविधामा पछि परेको छ । यहाँका बासिन्दा सामान्य उपचारका लागि पनि हेटौंडा र मनहरी बजार पुग्नुपर्ने बाध्यता छ । आधारभूत अस्पताल सुचारु भएपछि स्वास्थ्य सेवामा पहुँच अभिवृद्धि हुने गाउँपालिका अध्यक्ष लोकबहादुर मुक्तानले जानकारी दिए ।
अस्पताल स्थापना भएपछि कैलाश गाउँपालिकाका १० वटै वडा र राक्सिराङ गाउँपालिकाका ४ र ९ नम्बर वडाका बासिन्दा लाभान्वित हुने स्वास्थ्य शाखा प्रमुख गौतमले बताए ।
भवन उद्घाटन कार्यक्रममा जिल्ला समन्वय समिति मकवानपुरका प्रमुख ललित घलान, गाउँपालिकाका उपाध्यक्ष वालकुमार मल्ल ठकुरी, जिल्ला जनस्वास्थ्य कार्यालय मकवानपुरका प्रमुख किरण श्रेष्ठ, वडाध्यक्ष राजेन्द्र घिसिङ लगायतले बोलेका थिए । कार्यक्रममा जग्गादाता र भवन निर्माण गर्ने व्यवसायीलाई सम्मान गरिएको थियो ।
