संखुवासभा —
फागुन २१ मा सम्पन्न प्रतिनिधिसभा सदस्य निर्वाचनका लागि खटिएका १ हजार ३४ निर्वाचन प्रहरीलाई जिल्ला प्रहरी कार्यालयले सामूहिक रूपमा बिदाइ गरेको छ। शान्ति सुरक्षा व्यवस्थापनका लागि अस्थायी रूपमा भर्ना गरिएका उनीहरूलाई बिहीबार प्रमाणपत्रसहित बिदाइ गरिएको हो ।
प्रतिनिधिसभा सदस्य निर्वाचनको सुरक्षा व्यवस्थापनलाई प्रभावकारी बनाउन उनीहरूलाई माघ १८ गतेदेखि अस्थायी रूपमा भर्ना गरिएको थियो। निर्वाचन अवधिभर मतदान केन्द्र तथा आसपासका क्षेत्रमा शान्ति सुरक्षा कायम राख्न निर्वाचन प्रहरीले महत्त्वपूर्ण भूमिका निर्वाह गरेका थिए।
जिल्ला प्रहरीका डीएसपी कुमारप्रसाद मैनालीले शान्तिपूर्ण रूपमा निर्वाचन सम्पन्न हुनुमा निर्वाचन प्रहरीको महत्त्वपूर्ण योगदान रहेको बताए। उनले निर्वाचन प्रहरीले जिम्मेवारीपूर्वक कर्तव्य निर्वाह गर्दै सुरक्षा व्यवस्थापनलाई प्रभावकारी बनाएको उल्लेख गरे। 'यहाँ सिकेका ज्ञान, सीप र तालिमले व्यक्तिगत तथा सामाजिक जीवनमा समेत सकारात्मक प्रभाव पार्नेछ,' उनले भने।
निर्वाचन प्रहरी अनिषा जयरुले सुरक्षा बलको तालिमले मिहिनेत, अनुशासन, परिश्रम तथा समय व्यवस्थापनजस्ता महत्त्वपूर्ण सीप सिक्न सहयोग पुगेको बताइन्। उनका अनुसार तालिमका क्रममा सिकेका अनुभव र सीप भविष्यमा दैनिक जीवन तथा अन्य कार्यक्षेत्रमा पनि उपयोगी हुनेछन्।
डीएसपी मैनालीले निर्वाचन अवधिभर इमान्दारीपूर्वक सेवा प्रदान गर्ने सबै निर्वाचन प्रहरीको प्रशंसा गर्दै उनीहरूको योगदानको कदर हुने बताएका थिए।
