: इजरायलले लेबनानमा जारी दैनिक ठूलोस्तरका आक्रमणहरूलाई निरन्तरता दिँदा बेइरुत र दक्षिणी लेबनानमा एक दर्जन बढी मानिसको मृत्यु भएको छ । उता इरान र हिजबुल्लाहले इजरायलमाथि आक्रमणको श्रृंखला शुरु गरेका छन् । अमेरिकाले र इजरायलले इरानविरुद्ध सुरु गरेको व्यापक युद्धको प्रभावस्वरूप यो अस्थिर मोर्चामा द्वन्द्व झनै चर्किएको छ ।
बिहीबार बेइरुतको समुद्री किनारस्थित रामलेट अल–बैदा क्षेत्रमा इजरायलले गरेको ‘डबल–ट्याप’ आक्रमणमा आठ जनाको मृत्यु हुनुका साथै ३१ जना घाइते भएका छन् । निरन्तर बमबारीबाट बच्न विस्थापित परिवारहरू त्यही क्षेत्रमा आश्रय लिइरहेका थिए । लेबनानको सार्वजनिक स्वास्थ्य मन्त्रालयले उक्त जानकारी दिएको हो ।
अल जजिराकी संवाददाता हाइडी पेटका अनुसार रामलेट अल–बैदामा रहेका प्रत्यक्षदर्शीहरूले आफूहरू टेन्टमा सुतिरहेको बेला लडाकु विमानको आवाजले ब्युँझाएको बताएकी छिन् । ‘पहिलो विस्फोटपछि उनीहरूले टेन्टबाट टाउको बाहिर निकाल्दा दोस्रो विस्फोट भएको देखे’, उनले भनिन् ।
पेटका अनुसार यो आक्रमण इजरायलको अर्को लक्षित हत्या प्रयास जस्तो देखिन्छ, तर यस पटक आक्रमण परम्परागत रूपमा निशाना बनाइने क्षेत्रभन्दा बाहिर र इजरायलले खाली गर्न आदेश दिएका क्षेत्रहरूभन्दा पनि टाढा भएको देखिएको छ । ‘यी आक्रमणहरूलाई प्रायः ‘सटिक आक्रमण’ भनिन्छ, तर आज रातिको हमलामा ३१ जना घाइते र आठ जनाको मृत्यु भएको छ । यहाँ धेरै विस्थापित मानिस बसिरहेका छन्, जससँग जानका लागि अर्को ठाउँ छैन’, उनले बताइन् ।
अल जजिराकी अर्की संवाददाता जेइना खोद्रले यस आक्रमणलाई ‘यस द्वन्द्वमा स्पष्ट रूपमा बढेको तनावऎ को संकेत भनेकी छन् । लेबनानका सर्वसाधारण अहिले व्यापक क्षेत्रीय युद्धको मोर्चामा फसिरहेका छन् । लेबनानको राष्ट्रिय समाचार एजेन्सी (ल्ल्ब्) का अनुसार दक्षिणी लेबनान र अन्य स्थानमा इजरायलले गरेको आक्रमणमा थप कम्तीमा सात जनाको मृत्यु भएको छ । स्वास्थ्य मन्त्रालयका अनुसार बेइरुतबाट करिब १० किलोमिटर दक्षिणमा पर्ने अरामौन नगरमा भएको इजरायली आक्रमणमा तीन जनाको मृत्यु भएको छ भने एक बालक घाइते भएका छन् ।
बिन्त ज्बेल जिल्लाको देइर अन्तार नगरमा भएको अर्को आक्रमणमा दुई जनाको मृत्यु र छ जना घाइते भएका छन् । त्यस्तै माराकाह–टायर चोक नजिक चार तले भवनमाथि भएको आक्रमणमा दुई जनाको मृत्यु भएको बताइएको छ । क्षतिग्रस्त भवनमा अझै खोज तथा उद्धार कार्य जारी रहेको ल्ल्ब् ले जनाएको छ ।
यसअघि बिहीबार नै टायर जिल्लाको बुर्ज शमाली क्षेत्रमा भएको आक्रमणमा एक आमा र उनका तीन छोराको मृत्यु भएको थियो । साथै बालबेक जिल्लाको शाथ नगरमा भएको इजरायली आक्रमणमा आठ जनाको ज्यान गएको थियो । लेबनानका स्वास्थ्य अधिकारीहरूका अनुसार फेब्रुअरी २८ यता इजरायलले गरेको आक्रमणमा मृत्यु हुनेको संख्या ६३४ पुगेको छ ।
इजरायलमाथि हिजबुल्लाहको जवाफी आक्रमण
यसबीच हिजबुल्लाहले पनि रातभर इजरायलका सहर र सैन्य अड्डाहरूलाई लक्षित गर्दै विभिन्न आक्रमणहरू गरेको जनाएको छ । पश्चिम किनाराको रामल्लाहबाट रिपोर्ट गर्दै संवाददाता निदा इब्राहिमले भनिन्, ‘हिजो बेलुका करिब ८ बजे हिजबुल्लाहले उत्तरी इजरायलतर्फ १०० रकेट प्रहार गर्यो, जुन इरानसँग समन्वय गरेर गरिएको थियो । द्वन्द्व सुरु भएयता यो सबैभन्दा ठूलो रकेट आक्रमण हो ।’
इजरायलको च्यानल १४ का अनुसार उक्त आक्रमणमा कसैलाई चोट नलाग्नु ‘चमत्कार’ जस्तै भएको बताइएको छ, यद्यपि केही क्षतिको रिपोर्ट आएको छ । इब्राहिमका अनुसार यस आक्रमणले लाखौँ इजरायलीहरूलाई बंकर तथा आश्रयस्थलतर्फ जान बाध्य बनाएको छ । इजरायली सरकारले युद्धप्रति जनसमर्थन कायम राख्न नागरिकहरूलाई लामो समय आश्रयस्थलमा बस्नुपर्ने अवस्थालाई सावधानीपूर्वक व्यवस्थापन गरिरहेको छ ।
हिजबुल्लाहले उत्तरी यारा सैन्य ब्यारेकमा ड्रोन आक्रमण, बेइत लिद, ग्लिलोट (तेल अविव नजिक) र अटलित (हाइफा नजिक) सैन्य अड्डामा मिसाइल आक्रमण गरेको दाबी गरेको छ । त्यसैगरी दक्षिणी लेबनानमा रहेका इजरायली सैनिकमाथि तोप प्रहार गर्नुका साथै नहारिया सहरतर्फ ड्रोन र रकेट प्रहार गरेको जनाएको छ ।
समूहले बुधबार गरेको ड्रोन आक्रमणले मेरोन एयर अपरेसन कमाण्ड एन्ड कन्ट्रोल बेसको एक राडारमा क्षति पुगेको पनि दाबी गरेको छ । उता इजरायली सेनाले इरानबाट प्रहार गरिएका केही रकेटहरू खुला क्षेत्रमा खसेको जनाएको छ । साथै गोलान हाइट्स, हाइफा खाडी र उत्तरी इजरायलतर्फ रकेट प्रहार भएको पनि पुष्टि गरेको छ, जसका कारण विभिन्न क्षेत्रमा साइरन बजाइएको थियो ।
इजरायल र हिजबुल्लाहबीच लगातार भारी गोलाबारी भइरहे पनि यसको असर असमान रूपमा परेको देखिन्छ । युद्ध सुरु भएयता ७ लाख ८० हजारभन्दा बढी लेबनानी नागरिक विस्थापित भइसकेका छन् । उता लेबनानमा हालसम्म कम्तीमा दुई इजरायली सैनिकको मृत्यु भएको छ भने हिजबुल्लाहका रकेट आक्रमणबाट इजरायलमा केही व्यक्ति घाइते भएका छन् ।
