— सीमावर्ती जुलाघाट बजारमा रहेको सार्वजनिक शौचालयलाई एक व्यापारीले व्यक्तिगत रुपमा प्रयोग गरी ताला लगाउने गरेका छन् ।
दैनिक ३० भन्दा बढी जिप चल्ने र सयौं यात्रुको भिडभाड हुने जुलाघाट बजारमा दशरथचन्द नगरपालिकाले दशकअघि दुई कोठे शौचालय बनाएको थियो । जुलाघाट बजारमा रहेको उक्त सार्वजनिक शौचलायमा दुई/तीन वर्षदेखि स्थानीय व्यापारी रघुवीर थापाले ताला लगाउने गरेको स्थानीयले बताए । थापाले शौचालयमा ताला लगाएर चाबी आफैसँग राख्दा समस्या हुने गरेको यात्रु र अन्य व्यापारीले गुनासो गरेका छन् । स्थानीयले व्यापारी थापासित मागेर प्रयोग गर्दै आए पनि यात्रुले खुला स्थानमै दिसापिसाब गर्दै आएका छन् ।
शौचालय प्रयोग गर्न सधैं व्यापारी थापासँग चाबी माग्नुपर्ने र थापाको पसल बन्द भएको दिन सडक छेउमै शाैच गर्नुपर्ने बाध्यता रहेको जिप व्यवसायी सुशील क्षेत्रीले बताए ।
‘आफुहरु नियमित यसै ठाउामा ओहोरदोहर गर्ने भएकाले मात्र व्यापारी थापासँग सशौचालयको चाबी छ भन्ने थाहा भएकाले माग्ने गर्छौं,’ उनले भने, ‘नयाा मान्छेले त ताला लगाएको देखेर खुला स्थानमै शौच गर्छन् ।’
यो बजारमा महाकालीपारि भारतबाट समेत किनमेल गर्न आउने गर्छन् । आफ्नो पसल अगाडि रहेको शौचालय फोहोर गरिदिने भएकाले ताला लगाउने गरेको व्यापारी थापाले बताए ।
जुलाघाट बजारमै नगरपालिकाले अर्को शौचालय पनि बनाएको थियो । उक्त शौचालय अहिले सेरा जाने सडक निर्माण गरिँदा माटोले पुरिएको छ ।
नगरपालिकालाई शौचालय व्यवस्थापनको लागि समय समयमा जानकारी गराउँदा कुनै वास्ता नगरेको जिप व्यवसायी क्षेत्रीले बताए । जुलाघाटमा रहेको सार्वजनिक शौचालयको गुनासो आउने गरे पनि नयाँ निर्माण गर्ने ठाउँ नपाइएकाले अहिलेसम्म बनाउन नसकिएको नगरप्रमुख पुष्कारराज जोशीले बताए ।
