— बारम्बार सुक्खा पहिरो खसेपछि धनकुटाको भेडेटार–रविराँके सडकअन्तर्गत भेडेटार–नाम्जे खण्ड अवरुद्ध भएको छ। सामान्य वर्षापछि माथिबाट ढुंगा–माटो झर्न थालेपछि गए रातिदेखि सडक पूर्ण रूपमा बन्द भएको हो।
भेडेटार इलाका प्रहरी कार्यालयका प्रहरी नायब निरीक्षक रमेश प्रधानका अनुसार रातिदेखि लगातार सुक्खा पहिरो खसिरहेकाले सडक सञ्चालनमा कठिनाइ भइरहेको छ। 'माथिबाट ढुंगा र माटो खस्ने क्रम जारी रहेकाले तत्काल पहिरो पन्छाउन सकिएको छैन,' उनले भने।
भेडेटार–रविराँके सडक निर्माणको जिम्मा लिएको भारतीय निर्माण कम्पनी एप्को इन्फ्रा टेकले पहिरो हटाउन बिहानैदेखि डोजरलगायत उपकरण तयारी अवस्थामा राखेको छ। तर पहिरो झर्ने क्रम नरोकिएकाले काम सुरु गर्न नसकिएको प्रहरी नायब निरीक्षक प्रधानले जानकारी दिए।
उनका अनुसार पहिरो झर्ने क्रम रोकिएपछि मात्रै सडक सफा गर्ने काम सुरु गरिनेछ। आज नै सडक खुल्ने सम्भावना कम देखिए पनि निर्माण कम्पनीका कामदार र उपकरण तयारी अवस्थामा राखिएको उनले बताए।
सडक अवरुद्ध भएपछि उक्त मार्ग भएर यात्रा गर्ने सवारीसाधन बीच बाटोमै रोकिएका छन् भने यात्रुसमेत प्रभावित भएका छन्। स्थानीय प्रशासनले यात्रुलाई वैकल्पिक मार्ग प्रयोग गर्न तथा सावधानी अपनाउन आग्रह गरेको छ।
