— बेदकोट नगरपालिका–७ लालपुर चौराह नजिकै बिहीबार दुर्घटनामा परेर ज्यान गुमाएका आफन्तले पूर्वपश्चिम राजमार्ग बन्द गराएका छन् । उनीहरुले उचित क्षतिपुर्ती र दोषीमाथि कारवाहीको माग राख्दै शुक्रबार अत्तरिया-महेनद्रनगर खण्ड बिहानैदेखि सडक बन्द गराएका हुन् ।
मृतकका आफन्तहरुले बिहानैदेखि सडकमा जम्मा भएर यातायात पूर्णरुपमा बन्द गराएका छन् । घटना शंकास्पद भएको भन्दै उनीहरुले सत्यतथ्य छानबिनको समेत माग गरेका छन् । उनीहरुले आफन्तलाई जानकारी नदिएरै घटनास्थलबाट शवहरु उठाएकोमा आपत्ति जनाएका छन् ।
जिल्ला प्रहरी कञ्चनपुरका एसपी खडकबहादुर खत्रीका अनुसार आफन्ते उचित क्षतिपुर्ती पाउनुपर्ने माग गरिरहेका छन् । ‘आफन्तले क्षतिपुर्तीको माग राखेका छन्, हामी छलफल गरिरहेका छौं,’ एसपी खत्रीले भने ।
बिहीबार दिउँसो पूर्वपश्चिम राजमार्ग अन्तरगत कञ्चनपुरका बेदकोट नगरपालिका–७ लालपुरमा से१च १४०५ नम्बरको बोलेरो जिप र म२प ३५०६ नम्बरको मोटरसाइकल आपसमा ठोक्किएका थिए ।
प्रहरीका अनुसार मोटरसाइकल चालक भीमदत्त नगरपालिका–१ बारकुण्डाका ४० वर्षीय राम लुहार र पछाडि बसेका सोही ठाउँका ४० वर्षीय दानसिंह धामीको घटनास्थलमै मृत्यु भएको थियो ।
दुवै जनाको शव महाकाली प्रादेशिक अस्पतालमा राखिएको छ । आफन्तले माग पूरा नभएसम्म शव नबुझ्ने अडान लिएका छन् ।
