: पश्चिमी इराकमा बिहीबार भएको अमेरिकी सेनाको केसी-१३५ रिफ्युलिङ विमान दुर्घटनामा चालक दलका सबै ६ जना सदस्यको मृत्यु भएको छ। अमेरिकी केन्द्रीय कमान्डले विमानमा सवार कसैलाई पनि जीवित फेला पार्न नसकिएको भन्दै आधिकारिक रूपमा मृत्युको पुष्टि गरेको हो।
अमेरिकी केन्द्रीय कमान्डका अनुसार, उक्त विमान 'अपरेसन एपिक फ्युरी' अन्तर्गत सहयोगी हवाई क्षेत्रमा उडान भर्ने क्रममा दुर्घटनामा परेको थियो। कमान्डले सामाजिक सञ्जाल 'एक्स' मार्फत घटनाको अनुसन्धान सुरु गरिएको जानकारी दिएको छ। 'विमान कुनै शत्रुको आक्रमणबाट खसेको प्रारम्भिक संकेत देखिएको छैन,' कमान्डले स्पष्ट पारेको छ।
यद्यपि, अमेरिकी दाबीको विपरीत इराकको विद्रोही समूहले यसको जिम्मेवारी लिएको छ । रोयटर्सका अनुसार इराकको 'इस्लामिक रेजिस्टेन्स' नामक संगठनले उक्त विमान आफूहरूले खसालेको दाबी गरेको छ।
इरानी समाचार एजेन्सीले जारी गरेको विज्ञप्तिमा सो समूहले भनेको छ, 'इराकको राष्ट्रिय सार्वभौमिकता र हवाई क्षेत्रको रक्षा गर्न हामीले केसी-१३५ विमानलाई निशाना बनाएका हौँ।'
के हो केसी-१३५ विमान ?
केसी-१३५ एक विशाल रिफ्युलिङ ट्याङ्कर विमान हो, जसले उडिरहेका अन्य लडाकु विमानहरूलाई आकाशमै इन्धन भर्ने काम गर्छ। यस्तो महत्वपूर्ण विमान खस्नुलाई मध्यपूर्वमा सुरक्षा चुनौतीको रूपमा हेरिएको छ।
अमेरिकी सेनाले प्राविधिक कारणले विमान खसेको बताइरहँदा स्थानीय विद्रोही समूहले आक्रमणको दाबी गर्नुले यस क्षेत्रमा तनाव थप बढ्न सक्ने अनुमान गरिएको छ।
