: अमेरिकी राष्ट्रपति डोनाल्ड ट्रम्पले इरानको खार्ग टापुमा रहेका 'प्रत्येक सैन्य लक्ष्य'हरु अमेरिकाले ध्वस्त पारेको बताएका छन्। उनले यदि इरानले 'स्ट्रेट अफ हर्मुज' बाट हुने जहाज आवतजावतमा अवरोध जारी राखेमा उक्त टापुको तेल पूर्वाधारमा समेत आक्रमण गर्ने चेतावनी दिएका छन्।
ट्रम्पले सामाजिक सञ्जाल एक्समार्फत भनेका छन, 'केही समयअघि, मेरो निर्देशनमा अमेरिकी केन्द्रीय कमान्डले मध्यपूर्वको इतिहासमै सबैभन्दा शक्तिशाली बमबारी गरेको छ। हामीले इरानको 'क्राउन ज्वेल' (शिरको रत्न) मानिने खार्ग टापुका सबै सैन्य लक्ष्यहरूलाई पूर्ण रूपमा ध्वस्त पारेका छौँ। हाम्रा हतियारहरू संसारले अहिलेसम्म थाहा पाएका मध्ये सबैभन्दा शक्तिशाली र परिष्कृत छन्, तर नैतिकताका कारण मैले अहिले नै त्यहाँको तेल पूर्वाधारलाई नष्ट नगर्ने निर्णय गरेको छु।'
ट्रम्पले अगाडी थपेका छन्, यदि स्ट्रेट अफ हर्मुजबाट जहाजहरू सुरक्षित रूपमा जान पाएनन् भने इरानको तेल पूर्वाधारमा आक्रमण गर्ने निर्णयमा पुनर्विचार गर्नेछु ।'
इरानी तटबाट टाढा रहेको यो ५ माइल लामो टापु इरानको कच्चा तेल निर्यातको झण्डै ९० प्रतिशत हिस्सा ओगट्ने 'मुटु' मानिन्छ। इरानसँगको युद्ध सुरु भएको पहिलो दुई हप्तासम्म यो टापु सुरक्षित रहेको देखिएको थियो। एक अमेरिकी अधिकारीले अन्तराष्ट्रिय सञ्चारमाध्यम सीएनएनसँगको कुराकानीमा खार्ग टापुमा 'ठूलो स्तरको आक्रमण' भएको पुष्टि गरेका छन्। यद्यपि, ट्रम्पले दाबी गरे जस्तै सबै सैन्य लक्ष्यहरू नष्ट भए वा भएनन् भन्नेबारे आधिकारिक जानकारी दिइएको छैन।
आजै बिहान फक्स न्युजसँग अन्तर्वार्तामा कार्यक्रम प्रस्तोता ब्रायन किलमेडले खार्ग टापुमा आक्रमण हुने सम्भावनाबारे सोध्दा ट्रम्प निकै रिसाएका थिए। उनले उक्त प्रश्नलाई 'मूर्खतापूर्ण' भनेका थिए । यद्यपि उनले अन्तर्वार्तामा अमेरिकाले अर्को हप्ता 'इरानमाथि धेरै शक्तिशाली आक्रमण गर्ने दाबी गरेका थिए ।
अमेरिका-इजरायले गत फेब्रुअरी २८ मा संयुक्त हवाई हमला गरी इरानका सर्वोच्च नेता अयातोल्लाह अली खामेनीको हत्या गरेयता युद्ध जारी छ। जवाफमा इरानले इजरायल र अमेरिकी अड्डा रहेका खाडीका देशमा ड्रोन र क्षेप्यास्त्र प्रहार गरिरहेको छ।
